सरकारको दिनगिन्ती सुरु भएको भन्दै विश्वभरीका जनसम्पर्क समितिका नेताले दिए यस्तो चेतावनी

१९ मंसिर, काठमाडौं । नेपाली कांग्रेसका वरिष्ठ नेता रामचन्द्र पौडेलमाथि तनहुँमा भएको धरपकड र गिरफ्तारीको विश्वभरीका जनसम्पर्क समितिले निन्दा र भत्र्सना गरेका छन् ।

विश्वभरी रहेका नेपाली कांग्रेसका भातृ संगठनका नेताहरुले वरिष्ठ नेता पौडेलमाथि भएको प्रहरी दमन र हस्तक्षेप कम्युनिष्ट सरकारले मुलुकको जिम्मेवार पार्टीका वरिष्ठ नेतामार्फत सिंगो पार्टी र लोकतान्त्रिक आचरणमाथि प्रहार गरेको ठहर गरेको बताएका छन् ।

‘हामी पार्टीका वरिष्ठ नेतासहित अन्य नेतागण र साथीहरुमाथि भएको बर्बर प्रहरी दमन र हस्तक्षेपको विरुद्ध नेपाली कांग्रेस पार्टीले गर्ने सबैखाले प्रतिरोधप्रति ऐक्यवद्धता जाहेर गर्दै वर्तमान कम्युनिष्ट अधिनायकवादी सरकारको दिनगिन्ती आजको घटनाबाट सुरु भएको चेतावनी समेत दिन चाहन्छौं ।’ उक्त संयुक्त विज्ञप्तिमा भनिएको छ ।

यस्तो छ संयुक्त विज्ञप्ति
नेपाली कांग्रेसका बरिष्ठ नेता रामचन्द्र पौडेल र नेपाली कांग्रेसका नेता तथा पुर्व सांसद रामचन्द्र पोख्रेल लगायतका नेताहरु घाइतेहुने गरि भएको दमन र हस्तक्षेप निन्दनीय छ ।
नेपाली कांग्रेसका नेता रामचन्द्र पौडेलज्यूमाथि आज उहाँको गृहजिल्ला तनहुँमा भएको प्रहरी दमन र हस्तक्षेपको हामी कडा निन्दा र भर्त्सना गर्दछौं । यो दमन र गिरफ्तारी वर्तमान कम्युनिष्ट अधिनायकवादी सरकारको विद्रुप रुप हो भन्ने हाम्रो बुझाई छ। कम्युनिष्ट अधिनायकवाद यस्तै दमन र हर्कतको आवरणमा लोकतन्त्रको खिलाप सार्वजनिक हुने गर्दछ ।

आजको यस घटना सर्वसत्ताबादतर्फ उन्मूख वर्तमान कम्युनिष्ट सरकारले मुलुकको जिम्मेवार पार्टीका वरिष्ठ नेतामार्फत सिंगो पार्टी र लोकतान्त्रिक आचरणमाथि प्रहार गरेको ठहर गरेका छौं ।
लोकतन्त्रमा शान्तिपूर्वक भेला हुने, आफ्ना कुराहरु स्वतन्त्रतापूर्वक राख्न पाउने र विकास निर्माणका कामलाई विना कुनै अवरोध संचालन गर्न पाउने आधारभूत हक,अधिकारको सुरक्षा गरिएको हुन्छ । तर आफ्नै सरकारको पालामा निर्माण सम्पन्न भएको पूल उद्घाटन गर्न जाने क्रममा नेपाली कांग्रेसका नेतामाथि ओली सरकारको ठाडो निर्देशनमा भएको यस किसिमको प्रहरी हर्कत, धरपकड र गिरफ्तारीले सरकारको अधिनायकवादी अनुहार र चरित्र समेत उदांगो भएको छ ।

हामी पार्टीका वरिष्ठ नेतासहित अन्य नेतागण र साथीहरुमाथि आज भएको बर्बर प्रहरी दमन र हस्तक्षेपको विरुद्ध नेपाली कांग्रेस पार्टीले गर्ने सबैखाले प्रतिरोधप्रति ऐक्यवद्धता जाहेर गर्दै वर्तमान कम्युनिष्ट अधिनायकवादी सरकारको दिनगन्ती आजको घटनाबाट सुरु भएको चेतावनी समेत दिन चाहन्छौं ।

जय नेपाल

विश्वभरका नेपाली जनसम्पर्क समितिका सभापतिहरुको तर्फबाट

१- आनन्द बिष्ट, आमन्त्रित केन्द्रिय सदस्य एबं सभापति, नेजस -अमेरीका

२- बालकृष्ण पाण्डे आमन्त्रित केन्द्रिय सदस्य एबं सभापति,नेजस- भारत

३- सीता सापकोटा, सभापति, नेजस- बेल्जियम

४- लेख बहादुर गुरुङ सभापति, नेजस -मकाउ

५ -पदम सुन्दर गुरुङ सभापति, नेजस -बहराइन

६ -खगेश्वर अधिकारी सभापति, नेजस- इजरायल

७ -शिखर खड्का सभापति, नेजस- जर्मनी

८ -सिता अर्याल सभापति, नेजस -साईप्रस

९- डा एलिनी पोख्रेल सुवेदी, सभापति, नेजस पोल्याण्ड

१०- शुक्रराज न्यौपाने, नेजस- आईरल्याण्ड