उनी टिप्पणी गर्न खप्पिस थिए । कसैका रचनामाथि आउने उनका प्रतिकृया हेर्दा लाग्थ्यो उनी सबैकुराका जानकार छन् र कुनै रचना कसरी राम्रो हुन्छ भन्ने बारे उनलाई राम्रो जानकारी छ । हुन पनि उनले प्रतिक्रिया नजनाएको रचना नै भेट्न मुस्किल थियो ।
उनका टिप्पणीमा प्रायः,
भाषामा सुधार र शैलीमा परिमार्जन आवश्यक देखियो,
विषयवस्तु परम्परागत भए, नयाँ छान्नु पर्यो,
आकार अलि लम्ब्याउनु\छोट्याउनु पर्यो,
अझै अभ्यासको आवश्यकता देखियो, आदि उल्लेख हुन्थे ।
लेख्नेहरु भने उनका टिप्पणी प्रति सन्तुष्ट थिएनन् ।
एकपटक उनले यसैगरी टिप्पणी गरेका एक सर्जकले उनको टिप्पणीको प्रत्युत्तरमा उनले चाहेजस्तो र सम्पूर्ण गुणले युक्त पूर्ण रचना उपलब्ध गराई अध्ययन र सुधारको मौका दिन आग्रह गरे ।
जवाफमा उनले लेखे,- ‘लेख्न जानेको भए त कुरै अर्को भैहाल्थ्यो नि, टिप्पणी गर्ने फुर्सद नै कहाँ हुन्थ्यो र ?’
वि.सं.२०७७ मंसिर २७ शनिवार ११:०७ मा प्रकाशित