हामी सबैकाे संसारन्यूज

९ माघ । विश्व च्याम्पियन भारत्तोलक रुप कार्कीको हृदयघातका कारण निधन भएको छ । भारत्तोलनका अन्तर्राष्ट्रिय नेपाली खेलाडी तथा विश्व च्याम्पियन कार्कीको ५२ वर्षको उमेरमा शुक्रबार निधन भएको हो ।

अमेरिकाको भर्जिनियामा बस्दै आएका वरिष्ठ पावर लिफ्टिंग (शक्तित्तोलन) का खेलाडी कार्की यही खेलको प्रशिक्षण गर्ने सिलसिलामा नेपालमा थिए । नेपालमा भारत्तोलनको तालिम सञ्चालन गरेर आगामी पुस्तालाई पनि विश्व च्याम्पियन स्तरमा पुर्याउने उद्देश्यले अमेरिकाबाट नेपाल फर्किएका कार्की खेलकूदकै सिलसिलामा बुटवल पुगेका थिए । त्यहाँ हृदयघात भएपछि काठमाडौं ल्याउने क्रममा उनको बाटोमै निधन भएको हो ।

नेपाल भैरहवा स्थायी घर भएका रुप कार्की अमेरिका पुगे देखि नै शक्तित्तोलनको नियमित प्रशिक्षणमा व्यस्त बन्ने गर्दथे भने अमेरिकाको अति व्यस्त दैनिकीबाट समय निकालेर विभिन्न प्रतियोगिताहरुमा सहभागी हुने गरेका थिए ।

भारत्तोलन खेलको माध्यमबाट पटक पटक स्वर्ण पदक प्राप्त गरिसकेका छन् । गतवर्ष कार्कीले पावर लिफ्टिंग प्रतियोगितामा एक स्वर्ण र एक रजत पदक प्राप्त गरेका थिए ।

२०७६ सालमा आयरल्याण्डको लाइमरिकमा चार दिनसम्म सञ्चालित अन्तर्राष्ट्रिय प्रतियोगितामा आफ्नो वजन समूह मास्टर २ मा स्वर्ण पदक जितेका थिए । यसअघि सन् २०१७ मा अमेरिकाको एट्लान्टामा भएको आफ्नो वजन र उमेर समूहमा उनले स्वर्ण पदक जितेका थिए । नेपालको खेल इतिहासमा यो खेलमा स्वर्ण पदक जित्ने सम्भवत उनी पहिलो नेपाली खेलाडी हुन् ।