हामी सबैकाे संसारन्यूज

चैत ६, काठमाडौं । जनता समाजवादी पार्टी (जसपा)को बिहिबार बोलाइएको कार्यकारी समितिको बैठकलाई निकै चाँसोका साथ हेरिएको थियो । बिहिबारको बैठकबाट सत्ता समीकरणमा लागि निर्णायक मानिएको जसपाले कित्ता स्पष्ट पार्ने अपेक्षा गरिएको थियो । तर, पूर्वनिर्धारित बिहिबारको बैठक भने आन्तरिक किचलो बढेसँगै स्थगित हुन पुग्यो ।

बिहिबार बोलाइएको बैठक अनिश्चितकालका लागि स्थगित गरिएसँगै जसपामा गुटगत भेलाहरु भने हुन थालेका छन् । कार्यकारिणी बैठक स्थगित गराएसँगै बिहिबार नै दुवै पक्षका गुटगत भेलाहरु भएका थिए ।

पूर्वराजपा समूहका नेताहरु महन्थ ठाकुर र राजेन्द्र महतोको पहलमा बानेश्वरको इन्द्रेणी फुडल्याण्डमा भेला भएको थियो भने पूर्वसंघीय समाजवादी समूहका नेताहरु उपेन्द्र यादव र बाबुराम भट्टराई निकटका नेताहरु पार्टी कार्यालयमा जम्मा भएका थिए ।

ओलीको हस्तक्षेपसँगै जसपाभित्र भाँडभैलो

तत्कालिन नेपाल कम्युनिष्ट पार्टी (नेकपा)भित्र सामान्य कलह चलिरहेको बेला प्रधानमन्त्री केपी शर्मा ओलीले अप्रत्यासित रुपमा गत वैशाख ८ मा राजनीतिक दलसम्बन्धी अध्यादेश र संवैधानिक परिषदसम्बन्धी अध्यादेश ल्याएका थिए । अप्रत्यासित अध्यादेश ल्याइएसँगै तात्तिएको राजनीतिक माहोलका बीच जसपाका नेताहरुलाई अपहरण शैलीमा काठमाडौं ल्याइएको थियो । जससमय प्रधानमन्त्री ओली निकटस्थले नै स्पष्ट रुपमा जसपा विभाजन गराउन अध्यादेश ल्याइएको बताएका थिए ।

वैशाखमा गरिएको जसपा फुटाउने ‘रिहल्र्सल’ पुनः अहिले गर्न खोजिएको देखिन्छ । पछिल्लो समय ९ फागुनमा प्रधानमन्त्री ओलीले जसपाका पूर्व राजपा समूहका नेताहरुसँग गोप्य भेटघाट गरेसँगै जसपाभित्र बबण्डर मच्चिरहेको छ ।

९ फागुनमा प्रधानमन्त्री ओलीले जसपाका नेताहरुलाई सुटुक्क बोलाएर सत्ता गठबन्धन निर्माणको लागि कार्यदल बनाउने निर्णय गरेका थिए । जससँगै महन्थ ठाकुरले लक्ष्मणलाल कर्ण र सर्वेन्द्रनाथ शुक्ला सदस्य रहेको कार्यदल बनाएका थिए । तर, जुन कुराको सुँईको पूर्व संघीय समाजवादीलाई थिएन ।

विवादका कारण चयन हुन सकेन नेता

कार्यदल निर्माणसम्मको तहमा पूर्वराजपा समूह पुगेपछि जसपाभित्रको कलह उचाईमा छ । आन्तरिक कलह बढेसँगै दुई पक्षबीच विश्वासको वातावरणसमेत बन्न सकेको छैन् ।

जसको कारण जसपाले संसदीय दलको नेतासमेत चयन गर्न सकेको छैन् । यसअघि राजेन्द्र महतोलाई संसदीय दलको नेता बनाउने सहमती भएको भएपनि सुटुक्क कार्यदल निर्माणसँगै पूर्वपसंद्दीय समाजवादी पक्ष निकै असन्तुष्ट छ ।

ओलीको पक्षमा पूर्वराजपा, माओवादी र कांग्रेसको पक्षमा पूर्वसमाजवादी

अहिले जसपा पूर्ववत अवस्थामै फर्किएको छ । अध्यक्ष उपेन्द्र यादव र बाबुराम भट्टराई कुनै पनि हालतमा ओलीलाई साथ दिन नहुने लाईनमा देखिनु र महन्थ ठाकुर र राजेन्द्र महतो समूह ओलीसँग सहकार्य गरेरै जानुपर्ने लाईनमा देखिनुले समस्या बनाईरहेको देखिन्छ ।

संसद विघटन गराउने ओलीको कदमविरुद्व पूर्वसंघीय समाजवादी समूह आक्रामक रुपमा आन्दोलनमा देखिएको थियो । सो समूह अहिले ओलीलाई जसरी पनि बिदाई गर्नुपर्ने लाईनमा देखिएको छ ।

संघीय परिषदका अध्यक्ष बाबुराम भट्टराईले त सामाजिक सञ्जालमा ‘ओली हटाऊँ’ भन्ने अभियान नै चलाएका छन् । केहि दिन अघि ओलीले बोलाएको बैठकमा पनि उनले जान अस्वीकार गरेका थिए ।

अहिले जसपा ओलीसँग सहकार्य गर्ने वा नगर्ने भन्ने विषयमै बाँडिएको छ । यसले अन्ततः पार्टी विभाजनसमेत गराउन सक्ने सम्भावना देखिन्छ ।