हामी सबैकाे संसारन्यूज

कठोर परिश्रमले
थकित थकित मेरो वदनबाट
रगत-पसिनको सहस्रधारा
निरन्तर बग्नथाल्यो
हेर्दाहेर्दै,
त्यो रगत अनि पसिनाबाट
भव्य र आलिशान महलहरू ठडिए
ती सुविधा सम्पन्न महलहरू अगाडि
एउटा सुन्दर बगैंचा देखियो
त्यहाँ एउटा अजङ्गको रूखमा
हेर्दै खाउँ खाउँ लाग्ने
मीठो फलहरू लटरम्म फलेको देखियो
मेरो मुख पानीले भरियो
म फल टिपेर खाने आशाले
रूखमा चढेर फलहरूमा नियालेँ
प्रत्येक दाना फलमा
मेरो रगत पसिनाको सुगन्ध पाएँ
खुशी हुँदैन टिप्नलाई
हात लम्काएको मात्रै के थिएँ
अचानक एउटा धारिलो तरवारले
मेरा दुवै हात च्वाट्टै छिनालिदियो
अनि लामा लामा नङ्ग्रा
डरलाग्दो भयानक पञ्जाले
च्याप्प समातेर फुत्तफालिदियो
घाइते भएर जमिनमा पछारिएँ
देखेँ,
मेरो रगतपसिनाले बनेका सबै महलहरूमा
दानवहरूले कब्जा जमाएका रहेछन्
उनीहरू अट्ठहास गर्दै
मलाई गिज्याइरहेका रहेछन्
अनि एक झुन्ड राक्षसहरू
मेरो जिउलाई कुल्चिँदै रूखमा चढेर
मेरो रगत पसिनाको सुगन्धमिश्रित फल
टिपेर कपाकप खान थाल्दा
म लाचार भएर हेरिरहेँ
मेरो शिथिलता शरीरबाट
रगत र पसिना बगिरह्यो
म एकनासले सुक्दै गएँ
एकाएक मलाई असह्य पीडा भयो
मेरो मुटुमा असन्तुष्टिको आगो दन्कियो
मैले शरीरमा बाँकी भएको
सम्पूर्ण शक्ति लगाएर चिच्याएँ
“भगवान् न्याय चाहियो !“
झल्याँस्स बिउँझिदा
पसिनाले निथ्रुक्कै थिएँ
हरे शिव ! कस्तो विभत्स !!
तर यथार्थ सपना !!!
२०७७–१२–०४
चाँगुनारायण नपा–२, झौखेल, भक्तपुर ।