हामी सबैकाे संसारन्यूज

२३ चैत, काठमाडौं । उपत्यका प्रवेश गर्नेहरुले अब अनिवार्य एन्टीजेन परीक्षण गराउन पर्ने भएको छ । कोरोना भाईरसको संक्रमणको दर बढ्दै गएपछि आइतबार बसेको काठमाडौँ जिल्ला कोभिड-१९ संकट व्‍यवस्थापन समितिको बैठक यस्तो निर्णय गरेको हो ।

काठमाडौँका प्रमुख जिल्ला अधिकारी कालीप्रसाद पराजुलीका अनुसार काठमाडौँ उपत्यका प्रवेश गर्ने नाकाहरुमा सम्बन्धित नाकामा पर्ने नगरपालिकाले स्वास्थ्य जाँच र एन्टीजेन परीक्षण गर्न हेल्थ डेस्कको व्‍यवस्थापन मिलाउने र सम्पर्क व्‍यक्ति तोक्नु पर्ने छ । यदि कुनै व्यक्तिमा लक्षण देखिइ शंकास्पद लागेमा पीसीआर टेस्टको स्वाब संकलन गरी पठाउन समेत समितिले निर्देशन दिएको छ।

हाल छिमेकि देश भारत लगाएतका अन्य मुलुकहरुमा संक्रमणको दर बढ्दै गएको र नेपालमा पनि पछिल्लो समय संक्रमितसंख्या बढ्न थालेकाले समितीले यस्तो निर्णय गरेको हो । यसका साथै समितिले सबै नगरपालिकाहरुमा सञ्‍चालित आइशोलेशन केन्द्र र क्वारेन्टाइन सेन्टरहरुलाई अध्यावधिक गर्न र नगरपालिकाहरुलाई आ-आफ्नो नगरपालिका भित्र एक-एक वटा आइशोलेसन र क्वारेन्टाइनको व्‍यवस्थापन गर्न समेत अनुरोध गरेको छ ।

सार्वजनिक कार्यक्रमहरु पनि स्थगित गर्न र यदि गर्नैपरे कार्यक्रमका लागि नेपाल सरकारद्वारा जारी गरिएको स्वास्थ्य मापदण्डको पूर्ण रुपमा पालना गरेरमात्र सञ्‍चालन गर्न समितिले सबैमा अनुरोध गरेको छ ।