हामी सबैकाे संसारन्यूज

२६ चैत, काठमाडौं । एमाले सांसद महेश बस्नेतले प्रतिपक्ष दलका नेताहरुलाई सरकारले गरेको काम देखेर प्रेसर नबढाउन आग्रह गरेका छन् । उनले कांग्रेसका सांसद गगन थापालाई प्रधानमन्त्री केपी शर्मा ओलीलाई चुनौती दिएर बालहठ प्रदर्शन नगर्न समेत सुझाव दिए ।

बिहिबार बसेको प्रतिनिधिसभा बैठकमा बोल्दै नेता बस्नेतले सरकारको काम देखेर विपक्षी दलका नेताको प्रेसर बढेको बताए । गगन थापा प्रति इङकित गर्दै बालहठ देखाएर प्रधानमन्त्रीसँग च्यालेन्ज नगर्न पनि भनेका थिए । उनी अगि बोल्दै थापाले प्रधानमन्त्री ओलीलाई उद्घाटनको तमासा छाडेर कति विकास भयो छुट्टै बसेर बहस गर्न चुनौती दिएका थिए ।

सांसद बस्नेतले २०७४ सालको चुनावमा एमालेलाई जनताले बहुमत दिएको र कांग्रेसले प्रत्यक्षमा २३ सिट मात्र जितेर समानुपातिकबाट ६३ सिट ल्याएकाले आफ्नो हैसियत नभुल्न पनि आग्रह गरे ।

उनले सकेसाथ दिन र नसके बालहठ त्याग्न सुझाव दिदै भने, ‘प्रधानमन्त्रीलाई चुनौती दिएर बालहठ गर्ने कांग्रेसका साथीहरुलाई म के भन्न चाहन्छु भने यो बोकाको शैलीले दाई गरिँदैन दाई गर्नका लागि गोरुकै शैली चाहिन्छ । अहिले प्रतिनिधिसभामा सबैभन्दा ठूलो दलको हैसियतमा नेकपा एमालेले प्रतिनिधित्व गर्छ । प्रधानमन्त्रीले ल्याएका योजनाहरुलाई सके सहयोग गरौँ नसके वस्तुनिष्ठ ढंगले विश्लेषण गरौँ ।’