हामी सबैकाे संसारन्यूज

२८ चैत्र, काठमाडौँ । कोभिड–१९ सङ्कट व्यवस्थापन केन्द्र (सिसिएमसी)ले कोरोनाको दोस्रो लहर फैलन सक्ने भन्दै आवश्यक सुरक्षा सतर्कता अपनाउन आग्रह गरेको छ ।

विश्वभर कोभिड–१९ को दोस्रो लहर फैलिरहेको बेला सिएमसीको बैठकले लकडाउनकै घोषणा पो गर्ने हो की भन्ने आम मानिसमा अनुमान भएको बेला बैठकले आवश्यक सुरक्षा सतर्कता अपनाउन आग्रह गर्ने निर्णय गरेको हो ।

सिसिएमसीको आजको बैठकले पछिल्लो समय कोभिड सङ्क्रमणको मात्रा बढेको र नयाँ स्वरूपको भाइरस देखिन थालेको भन्दै आवश्यक सतर्कता जरुरी रहेको निष्कर्ष निकालेको हो । प्रधानमन्त्री तथा मन्त्रिपरिषद्का सचिव खगराज बरालका अनुसार बैठकमा पछिल्लो सङ्क्रमणको स्थिति तथा तयारीको विषयमा छलफल गरिएको र आमरूपमा सतर्कता अपनाउन अपिल गर्ने निर्णय भएको छ ।

यस्तै जिल्लास्थित कोभिड–१९ सङ्कट व्यवस्थापन केन्द्रलाई थप सक्रिय बनाउने, सीमा नाकामा रहेका स्वास्थ्य डेस्कलाई थप प्रभावकारी बनाउने, एन्टिजेन परीक्षण बढाइने भएको छ । कोरोनाको लक्षण देखापरेका बिरामीलाई अस्पताल भर्ना गर्ने र लक्षण नदेखिएकालाई क्वारेन्टिनमा राख्ने निर्णय पनि बैठकले गरेको छ। स्वास्थ्य मापदण्डलाई पूर्णरूपमा पालना गर्न बैठकले आग्रह गरेको छ ।

अहिले नै कुनै कडा कदम चाल्ने अवस्था नरहेको बताउँदै सचिव बरालले तर कुनै पनि क्षेत्रबाट स्वास्थ्य मापदण्ड पालना नभई अटेरी रुपमा सञ्चालनमा आएको पाइए कडा कदम चाल्नुपर्ने अवस्था आउन सक्ने बताए ।