हामी सबैकाे संसारन्यूज

५ बैशाख, काठमाडौं । गृहमन्त्री राम बहादुर थापा बादलको सांसद पद खारेज भएको छ । नेकपा माओवादी केन्द्रले थापालाई पार्टीबाट निस्कासन गरिएको भन्दै सांसद पद खारेजीका लागि संसद सचिवालयमा पत्र पठाएपछि उनको सांसद पद खारेज भएको हो । यो सँगै उनको गृहमन्त्री पद पनि गुमेको छ ।

‘नेपालको संविधानको धारा ८९ को खण्ड (ङ) बमोजिम राष्ट्रियसभा सदस्य माननीय राम बहादुर थापा मगरको पद रिक्त हुन आएकोले राजनीतिक दल सम्बन्धी ऐ, २०७३ को दफा ३५ को उपदफा (२) तथा राष्ट्रियसभा नियमावली, २०७५ को नियम १८६ को उपनियम (२) बमोजिम राष्ट्रियसभाका सम्माननीय अध्यक्षबाट स्वीकृत भए बमोजिम यो सूचना प्रकाशित गरिएको छ ।’ संघीय संसदका महासचिव भरतराज गौतमद्धारा जारी सूचनामा भनिएको छ ।

वागमती प्रदेशसभाबाट राष्ट्रिय सभा सांसद बनेका थापाले सर्वोच्च अदालतको २३ फागुनको निर्णयले नेकपा बदर गर्दै नेकपा एमाले नेकपा माओवादी केन्द्र व्युँत्याइ दिएपछि थापाले माओवादी केन्द्र त्यागेर एमालेमा लागेका थिए ।

नेकपा माओवादी केन्द्रले यसअघि पनि प्रतिनिधिसभा सदस्य तथा मन्त्री समेत रहेका टोपबहादुर रायमाझी, लेखराज भट्ट, प्रभु साह र गौरीशंकर चौधरीलाई कारबाही गरेपछि उनीहरुको पनि सांसद पद खारेज भएको थियो । उनीहरुलाई प्रधानमन्त्री ओलीले विभिन्न मन्त्रालयको पदमा नियुक्त गरिसकेका छन् ।