हामी सबैकाे संसारन्यूज

आमा विना जीवन हेर कस्तो
उराँठ लाग्दो वन कुञ्ज जस्तो ।
त्यो काख तिम्रो अति नै पवित्र
तिम्रै छ तस्वीर सदा मभित्र ।। १।

बोकेर नानी नित खोकिलामा
बसेर भोकै पनि टन्न आमा ।
बाँडेर हांँसो दिनरात आमा
हुन् बाँच्न सक्ने जननी धरामा ।।२।

दिएर माया न त रित्तिने छिन्
भन्डार जस्तो न त सिद्धिने छिन् ।
यो शब्द प्यारो अति नै मलाई
भन्यौ सधैँ सन्ततिको भलाई ।।३।

पार्ने उज्यालो झलमल्ल सारा
सुन्ने तिमी नै दिलको पुकार।
वात्सल्य पोख्ने ममता अपार
आमा तिमी हौ मनकी जुहार ।।४।

किनेर पाइन्न कदापि आमा
पाइन्छ माया ममता दिँदामा ।
सेवा सुरक्षा नित गर्न पाऊँ
अपार माया दिलमा सजाऊँ ।।५।