हामी सबैकाे संसारन्यूज

प्रकृतिका विविधता
अविचल सुदृढ हिमचुलीका
अकलुषित शुभ्र सौन्दर्यमा
दृष्टि पर्दा
मेरै सामुन्ने हुन्छ्यौ तिमी

सुन्दर पहाडी हरियाली
धुपी, सल्ला र गुराँसे
वासन्ती बहार लिएर
बिहानै आएकी उषासंग
फक्रिएका पुष्प पत्रमा
टल्किने मोतीकणमा
दृष्टि पर्दा
मेरै सामुन्ने हुन्छ्यौ तिमी

पाखा पखेराका रेखाझैँ
तेर्सा गोरेटाहरू
हिँड्दै
द्यौराली भञ्ज्याङ
वरपिपल चौतारीको छाहारी
हिमालदेखि आएको सिर्सिरे बतास
एकैछिनको विश्राम
ओबाउँदै पसिना
र नजिकै पहरा रसाएको
बाँसको डुँडी जोडिएको
तुरतुरे धारो
अञ्जुली जोडेर
पिउँदै चिसो पानी
आँत रसाउँदा
मेरै सामुन्ने हुन्छ्यौ तिमी

घनघोर वनैवनको बाटो
लेकतिर उकालीमा भेटिने
झर्नाहरू
नजिकै छाँगा छहरा
सुशीतल बाछिटा
भर्दै अँजुलीमा
धोएर मुख
आनन्दले वरिपरि
नियाल्दै जाँदा
मेरो सामुन्ने हुन्छ्यौ तिमी

मेची महाकाली
कोशी कर्णाली
सेती काली
गण्डकीका
अजस्र जलाधारमा
तन डुबाएर
मन भुलाउन खोज्दै
आफ्नै सम्पदा
मस्तिष्कले रोज्दै
विश्व व्यापकतामा

नदी नालाका कलकल
सुस्तरी सुनिरहँदा
समस्थली र फराकिला फाँटमा
रमाएर हिँडिरहँदा
चारकोसे घना जङ्गललाई
पूर्वपश्चिम राजमार्गछेउबाटै
यात्राकै द्रुतदृष्टिमा कैद गर्दा
जङ्गली अर्ना
एकसिङ्गे गैडा
मृगका बथान
अनि
काँसेघारीमा मन बहलाउँदा
सधैँ सधैँ
मेरै सामुन्ने हुन्छ्यौ तिमी ।

मेची महाकाली
कोशी कर्णाली
सेती काली
गण्डकीका
अजस्र जलाधारमा
तन डुबाएर
मन भुलाउन खोज्दै
आफ्नै सम्पदा
मस्तिष्कले रोज्दै
विश्व व्यापकतामा
आत्मीयताले
परिभ्रमण गर्दै
जहाँ जहाँ पुगूँ
मेरो मनमस्तिष्कमा
आइरहन्छ तिम्रै छायाँ
निरन्तर निरन्तर
लागिरहन्छ तिम्रै मायाँ
सत्ते सत्ते दिनरात दिनरात
मेरै सामुन्ने हुन्छ्यौ तिमी ।
हो दिनरात दिनरात
मेरै सामुन्ने हुन्छ्यौ तिमी ।