हामी सबैकाे संसारन्यूज

हेर्दा लाग्दछ सुन्दरी कति तिमी हौ उर्वशी नै स्वयं
मेरा नेत्रहरू दुबै गलिसके हौ जूनतारा स्वयं
तिम्रो रूप यहाँ सुवासित हुँदा झर्दै छ झै बादल
तिम्रो प्यास सबै बुझाउछु भनी पानी परेको तल ।१।

कस्तो रूप छ मोहिनी पनि अहा ब्रह्माण्ड लोभ्याउने
सोहोरीकन छेउमा भुवनका आँखाहरू ल्याउने
तिम्रा केश सरर्र फैलिरहदा गर्जिन्छ झैँ मेघ यो
आफै शब्दविहीन भैकन सधैं नाच्ने जुरेली छ यो ।२।

ती मुस्कान यहाँ प्रदर्शन हुँदा आफै बने मोहित
तिम्रो सुन्दर भाष्यले हृदयको पाटो भयो झङ्कृत
तिम्रो डिम्पलले स्वयं हिमचुली हास्दै छ है मन्द भै
गाई चिर्बिर गर्दछन कति चरी नाचेर आनन्द भै ।३।

हिंड्दा पाउजु बज्दछन छमछमी, बिर्सेर सारा धुन ?
चल्दाखेरि चुराहरू कति बजे बेचैन झै हुन्छु म
बोल्दाखेरि त आउँछन् लय भरी सङ्गीतका रागिणी
हेर्दा नेत्र फिका फिका किन भयो सारा शरद् यामिनी ।४।

देखी लौ न गुरास झैँ अधरले, उन्मत्त पार्यो दिल
तिम्रा मोहक शब्दले हृदयका उत्रे कि सारा खिल
यस्तो लाग्छ अचेल भित्र मनमा हे सुन्दरी लौ सुन
बढ्ने गर्दछ छट्पटी कति ममा पग्लन्न तिम्रो मन ।५।

छन्द: शार्दूलविक्रीडित
गण– म स ज स त त गु
मात्रा–SSS IIS ISI IIS SSI SSI S