हामी सबैकाे संसारन्यूज

१.
कालले नि मर्छ, अनिकालले नि मर्छ ।
यो मान्छे हजुर जुनसुकै हालले नि मर्छ ।
यसरी मर्यो त्यसरी मर्यो भन्ने बहाना हो,
मिति पुग्यो कि, आफ्नै तालले नि मर्छ ।
२.
असारे झरिले घरगोठमा गिलो लागेको छ ।
खेतबारी अनि बाटोभरी हिलो लागेको छ ।
किसानलाई धान रोप्न भएको छ चटारो,
यस्तै बेला देशलाई हजुर पिलो लागेको छ ।
३.
मान्छे जस्तो भएनी देख्दा असल हुनुपर्छ ।
ठुल्ठुला महल, गाडी अनि पसल हुनुपर्छ ।
आजकाल सोझोलाइ टेरेको छ पो कसले,
ए ! हजुर जगल्टे, गुन्द्रेमुन्द्रे र मसल हुनुपर्छ ।
४.
सुख आ–आफ्नै, दुःख उस्तै हुन्छ ।
संसारमा सबैको भुख उस्तै हुन्छ ।
ए ! हजुर मुहारमात्र पो फरक हो,
खञ्चुवाको खानेमुख उस्तै हुन्छ ।
५.
संसार भरि धुलो जहाँ पनि हुन्छ ।
नदी, खोला र कुलो जहाँ पनि हुन्छ ।
कोहि अबसर खोज्छ, कोहि दाउँ,
माछा खाने बकुलो जहाँ पनि हुन्छ ।