हामी सबैकाे संसारन्यूज

बताऊँ समस्या समाधान हुन्नन्
यहाँ बालबच्चा गरा खेत छुन्नन्
कता पोखिँदै छन् भरोसा युवाका
बने व्यर्थ थोत्रा इशारा बुवाका ।१।

कतै विघ्न वर्षा कतै छन् खडेरी
भयो झन् अँध्यारो रुदैछन् मझेरी
युवा देश छाडी कतै दूर बस्छन्
सह्मालेर बस्ने यहाँ वृद्ध हुन्छन् ।२।

सुकेको छ धेरै गरा वर्ष देखि
लुकेको छ पीडा म बस्दै छु लेखी
थिए रीत हाम्रा सबैमा समान
अरूको र आफ्नो हिया एक मान ।३।

अहिंशा थियो एक यो मन्त्र जस्तै
सदाचार बाँड्थे अरूमा दुरुस्तै
सबैले भुलेछन् हिँजोका कहानी
दिए रक्तको दान आयो बिहानी ।४।

सबैले पिताका भुले सत्य यस्तो
हिँडे गाउँ छाडी भयो देश रित्तो
रहे झेल्नलाई समस्या यताका
रुँदै वृद्ध वृद्धा कठै वेदनामा ।५।

छन्दः भुजङ्गप्रयात