हामी सबैकाे संसारन्यूज

मैले यो जङ्गल लाई पनि बस्ने बनाउनेछु
चुलाचौकोमा दाल चावल पस्ने बनाउनेछु ।।

मान्छे कम पशु ज्यादा, भएको शहर छोडी,
अध्यारा भित्रै उज्यालो मैन रस्ने बनाउनेछु ।।

ईर्ष्या द्वेष र बिषले, जकडिएको जङ्गलमा,
कलकलाउदो मनको झरना खस्ने बनाउनेछु ।।

तान्दै छन,जाल हान्दैछन ती फटाहाहरु,
चिप्लाउदै आफ्नै जालमा फस्ने बनाउनेछु ।।

छिन छिनमा बिषदन्त बिझाउन खोज्छन,
प्रतिकारमा बिषलाई बिषैले डस्ने बनाउनेछु ।।

बाध्य बनाउनेछु तिनिलाई क्षद्मभेष छोडन,
लाजशरम ले आफ्नै घाँटी कस्ने बनाउनेछु ।।

छट्पटाएर बौलिदैछ्न, सुनेको छु पापिहरु,
नाङ्गो पारी एकदिन खरानी घस्ने बनाउनेछु ।।