हामी सबैकाे संसारन्यूज

विचारपुञ्ज मान्छे
भावनाको
जलतरङ्ग मान्छे
पहाडमा
सन्तुलन खुस्केर
तल गिरेझैँ
जलको मात्रा बढी भएर
आकाश हल्लदा
झरी झरेझैँ
बाष्पीकृत समयको
तन्तु खुस्केर
चट्याङ्को चर्को
नुन् पड्केझैँ
मान्छेभित्रका
असङ्ख्य चाहना जेलिएर
उग्र उन्मादमा
एउटा उफ्रेपछि
बाढी उम्लेर
धरा माथिमाथि
विध्वँश दौडेझैँ
चैतको खहरे
एकाएक
पर्वत भत्केर सुकेझैँ
मान्छे
खुसुक्क सकिन्छ
संसार पराजित भएर
-सन्तुलन टुटेपछि
-संयम हराएपछि
नियन्त्रणभन्दा माथि आवेग
मर्चाको घोडाझैँ हिन्हिनाएपछि
साँढेका सिङ चिलाएझैँ
मान्छे
अनायास
पराजित हुन्छ मृत्यु
मृत्यु
अनायास
विजित हुन्छ मान्छे
यसमा
कुनै साँध रहन्न
सीमा कोरिन्न
झुप्रो मर्नसक्छ
पतिगालीको अन्ध आवेगमा
-पत्नी बनेर
पत्नी अटेरको सानो छेस्कामा
-पति बनेर
एउटा आलिशान
महल ढल्न सक्छ
सुरा सिसीको
-सानो प्वाल बनेर
तानाशाह
गोली जल्न सक्छन्
आसनलालशाको
पिरो धुवाँ बनेर
लालसी
जिब्रो टोक्न सक्छन्
प्राप्तिको खिरिलो डोरी छिनेर
प्रेमी
चिता जल्न सक्छ
अनिच्छित प्रेमविलासको
-केश टुटेर
–प्रणय रागविराग उम्लेर
धराका राष्ट्राध्यक्षहरू
मन्त्री\प्रधानमन्त्रीहरू
-सत्तासुखको
-भत्ता हुङ्कारको
-मत्ता अहङ्कारको
अन्धावेग उम्लेर
गल्ली झरेका छन्
जिउँदै मरेका छन्
अज्ञानता
अन्ध आवेग हो
सधैँ सधैँ
दिउँसै सपना देख्छ यसले
-भनको उचाइ
-बलको उचाइ
-शक्तिको उचाइ
-प्राप्तको सहज उचाइ
तर सम्झन्न
जन्मनु
-नचाहेको संयोग हो
पाऊँ,ठिकै छ
-संयोग हो
गुमोस्,ठिकै छ
-संयोग हो
आसन अग्लूँ,ठिकै छ
-संयोग हो
महल उक्लूँ, ठिकै छ
-वास न हो
जेल परूँ, ठिकै छ
-घर आफ्नै न हो
प्रणययोग होस्, ठिकै छ
-शरीर न हो
वियोग होस्, ठिकै छ
-संयोग हो हुनुको
हुनुभित्र नहुनुको
नहुनुभित्र हुनुको
सुकेको जङ्गल
वसन्त वहार हुन्छ
वहारको हरियाली सुक्छ
पाले÷हुर्काए यसलाई राम्ररी
अन्ध आवेगले
कहानेर दुख्छ ??