हामी सबैकाे संसारन्यूज

कुवेत । एकसाताको अन्तरालमा कुवेतमा ४ नेपालीले ज्यान गुमाएको समाचार छ । तेह्रथुम, इलाम तथा परिचय नखुलेका २ महिलासहित ४ नेपालीको मृत्यु भएको हो ।

तेह्रथुम आठराइ गाउँपालिका ४ इवाकी सञ्चिता बस्नेतको उपचारकै क्रममा अस्पतालमा मृत्यु भएको छ ।

फर्वानिया अस्पतालमा उपचार गराइरहेकी बस्नेतको १७ अक्टोबरमा मृत्यु भएको नेपाल कुवेत सरोकार समाजका संरक्षक राम तामाङले संचारमाध्यमलाई जानकारी दिएका छन् । बस्नेत केही समयदेखि कुवेतमा अवैद्यानिक रुपमा बस्दै आएको समेत बताइएको छ ।

त्यस्तै ३० सेप्टेम्बरका दिन ईलामका प्रदीप फागु आफ्नै कोठामा मृत अवस्थामा भेटिएका छन् । कुवेतमा तीनवर्ष देखि कार्यरत सन्दकपुर गाउँपालिका– १ का २८ वर्षीय फाुगुको हृदयघातका कारण मृत्यु भएको बताइएको छ ।
फागु मंगाफस्थित ब्लक–३ मा आफ्नै कोठामा सुतिरहेको अवस्थामा मृत भेटिएको सृजनशिल युवा समाज कुवेतका अध्यक्ष पुस्करसिंह धामील बताएका छन् । कम्पनीबाट भागेर अवैद्यानिक रुपमा अर्कै कम्पनीमा काम गरिरहेका फागुका घरमा एक छोरी र श्रीमती छन् ।

कम्पनीबाट भागेर अर्कै ठाउँमा काम गरेका फागुको शब नेपाल पठाउन कम्पनीले कुनै सहयोग गर्न नसक्ने बताएको र दूतावासले उनको शब नेपाल पठाउन पहल गरिरहेको बताइएको छ ।

त्यसैगरी अन्य दुई नेपाली महिलको पनि मृत्यु भएको जनाइएको छ । स्पष्ट परिचय नखुलेका उनीहरुको कुनैपनि कागजात नभएकोले नेपाली भएपनि कुन जिल्लाका हुन् भन्ने नखुलेको बताइएको छ ।
दूतावासकी द्वितीय सचिव जानकी ओझाका अनुसार उनीहरूको फिङ्गर प्रिन्ट रिपोर्ट आएपछि मात्र परिचय खुल्नेछ ।
दूतावासले पछिल्ला समयमा कुवेतमा मृत्यु हुने नेपालीहरुको संख्या बढ्दै गएको र शब पठाउन समेत समस्या पर्दै गएको समेत बताएको छ ।