हामी सबैकाे संसारन्यूज

काठमाडौं । नेकपा (एमाले)का अध्यक्ष केपी शर्मा ओलीले पार्टीभित्र प्रतिस्पर्धाको अभ्यास भन्दा सहमतिलाई अगाडि बढाउनुपर्ने बताएका छन् । उनले प्रतिपक्षी र विपक्षीसँग प्रतिस्पर्धा गर्ने तर, पार्टीभित्र एकता हुनुपर्ने बताए ।

१० औं महाधिवेशनको बन्द सत्रलाई सम्बोधन गर्दै उनले भने, ‘पार्टीभित्र एकता मुख्य कुरा हो । प्रतिपक्षीसँग प्रतिस्पर्धा मुख्य कुरा हुन्छ । पार्टीभित्र अगाडि बढ्दा एकता मुख्य कुरा हुन्छ । पार्टीभित्र प्रतिस्पर्धा मुख्य कुरा होइन एकता मुख्य कुरा हो । यसले विपक्षीसँग लड्नका लागि बल पैदा हुन्छ ।’

उनले एकताको पक्षमा पार्टीभित्र भएको संघर्षले नै एमाले अहिलेको अवस्थामा आएको बताए । महाधिवेशनमा पदाधिकारी चयनको विषयलाई लिएर भएको प्रतिस्पर्धाप्रति इंकित गर्दै सहमतिभन्दा बाहिर जान नहुने बताए ।

ओलीले सुरुदेखि नै पार्टीभित्र सहमतिबाट पदाधिकारी चयन गर्नुपर्ने अडान राख्दै आएका छन् । एकताको महाधिवेशनको भएको कारण सहमतिमै सबै पक्षलाई समेट्नुपर्ने बताएका छन् ।

तर, ओली समूहभित्रै विभाजन देखिए पछि भने सहमतिको विषय कमजोर बन्दै गएको देखिन्छ ।