हामी सबैकाे संसारन्यूज

काठमाडौं । नेकपा (माओवादी केन्द्र) को आठौं महाधिबेशन राजधानीमा सुरु भएको छ । पौष ११ देखि १५ सन्चालन हुने महाधिबेशनले पार्टीमा पहिलोपटक बहुपदीय नेतृत्व चयन गर्ने भएको छ ।

आइतवार विभिन्न राजनीतिक दलका शिर्षस्थ नेताहरुको उपस्थितिमा राजधानीको प्रज्ञा प्रतिष्ठानमा पार्टीका अध्यक्ष पुष्पकमल दाहाल ‘प्रचण्ड’ ले महाधिबेशनको उद्घाटन गरेका हुन् ।

आइतवारको उद्घाटन सत्र सम्पन्न भएसँगै सोमवार ११ बजेदेखि सो पार्टीको बन्दसत्र सुरु हुनेछ । बन्द सत्रमा अध्यक्ष पुष्पकमल दाहाल ‘प्रचण्ड’ले पार्टीको राजनीतिक प्रतिवेदन पेश गर्नेछन् भने विधान संशोधन लगायतका विविध विषयमा छलफल हुने समेत बताइएको छ ।

१५ पदाधिकारीमा को–को छन् त आकांक्षी
नेकपा (माओवादी केन्द्र) को आठौं महाधिबेशनले केन्द्रीय समितिमा १५ पदाधिकारीसहित १९९ सदस्य चयन गर्नेछ । आइतवार बिहान सम्पन्न पार्टीको केन्द्रीय समितिको बैठकले गरेको विधान संशोधन अनुसार अव पार्टीमा १५ पदाधिकारीसहित १९९ केन्द्रीय सदस्य हुनेछन् । विधान अनुसार अध्यक्ष, वरिष्ठ उपाध्यक्ष, ६ उपाध्यक्ष, १ महासचिव, २ उपमहासचिव, ३ सचिव र एक कोषाध्यक्षसहित १५ पदाधिकारी र १८४ केन्द्रीय सदस्य सहित अब पार्टीमा १९९ जनाको केन्द्रीय समिति बन्ने भनिएको छ ।

नेकपा ( माओवादी केन्द्र ) को १५ पदाधिकारीमा हालसम्म आकांक्षी देखिएकामा वरिष्ठ उपाध्यक्षमा नारायणकाजी श्रेष्ठ सर्वसम्मत जस्तै देखिएका छन् । हालसम्म श्रेष्ठ बाहेक वरिष्ठ नेतामा अन्यले इच्छा देखाएको पाइएको छैन ।

त्यसैगरी पार्टीको ६ उपाध्यक्षका लागि कृष्ण बहादुर महरा, वर्षमान पुन, देव गुरुङ,हरीवोल गजुरेल, मातृका यादव, लीलामणि पोखरेल, गिरीराज मणि पोखरेल लगायतका आंकाक्षीं देखिएको बताइएको छ । यद्यपी चीनमा उपचार गराइरहेका वर्षमान पुन महासचिवका लागि आकांक्षी देखिएको पनि बताइएको छ ।

त्यसैगरी १ महासचिव पदमा जर्नादन शर्मा ‘प्रभाकर’ र नेतृ पम्फा भुसाल आकांक्षी देखिएका छन् । जनार्दन शर्माले महासचिवमा आफु नै हुनुपर्ने दावी गरिरहेको अवस्था भएकाले नेतृ भुसाललाई उपाध्यक्ष बनाउने अध्यक्ष प्रचण्डको तयारी रहेको पनि बताइएको छ । यद्यपी भुसाल निकट स्रोत भन्छ ‘उहाँले महासचिव पदमै दावी गर्नुहुनेछ र उहाँ यस पदका लागि योग्य पनि हुनुहुन्छ ।’

त्यसैगरी २ उपमहासचिवमा हालसम्म शक्ति बस्नेत, हरिबोल गजुरेल, देवेन्द्र पौडेल, चक्रपाणी खनाल, गणेश साह लगायतको दावी रहेको स्रोत बताउँछ ।

त्यस्तै ३ सचिव पदका लागि अहिलेसम्म कोही पनि आकांक्षीको नाम सार्वजनिक नभइसकेको अवस्थामा उपमहासचिवका आकांक्षीलाई नै सचिवमा ल्याउन सकिने अध्यक्ष दाहालको तयारी रहेको बताइएको छ । यद्यपी यी पदका लागि अन्य व्यक्तिहरुले पनि दावी गर्ने समय रहेकाले कुन पदमा कस्ले उम्मेदवारी दिने भन्ने छलफल गर्न अझै समय रहेको छ । यद्धपी हितमान शाक्य, रेखा शर्मा र लेखनाथ न्यौपानेहरु सचिवमा ब्यबस्थापन हुने अडकल पनि उत्तिकै गरीएको छ । पदसंख्या थपिएकाले प्रचण्डलाइ नेतृत्व ब्यबस्थापन गर्न गाहो नहुने भएको छ ।

माओवादीको सोमवार ११ बजेदेखि सुरु हुने बन्द सत्रमा अध्यक्ष दाहालको प्रतिवेदन र नेता देव गुरुङले विधान संशोधन प्रस्ताव पेश गर्नेछन् । अध्यक्षको राजनीतिक प्रतिवेदन, नेता गुरुङको विधान संशोधन प्रस्ताव पेश गरेपछि सहभागी प्रतिनिधिलाई १५ समुहमा विभाजन गरेर छलफल गरिने बताइएको छ । उक्त प्रतिवेदन पारित भएसँगै नयाँ नेतृत्व चयनका लागि प्रक्रिया सुरु गरिने सो पार्टीको सचिवालयले जनाएको छ ।

माओवादी केन्द्रको आठौं महाधिबेशनः आजदेखि बन्द सत्र