Sansar News
काठमाडौं । पूर्वप्रधानमन्त्रीसमेत रहेका जनता समाजवादी पार्टीका नेता डा। बाबुराम भट्टराईको गृहनगर गोरखाको पालुङटार नगरपालिकामा एमाले र जसपाबीच चुनावी तालमेल हुने भएको छ । कांग्रेससँग सहमति भाँडिएपछि अन्तिम समय जसपाले एमालेसँग तालमेल गरेको हो ।
मंगलबार भएको सहमतिअनुसार मेयरमा एमालेले जसपालाई सघाउने छ भने उपमेयरमा जसपाले एमालेलाई सघाउने छ । त्यस्तै दुई दलबीच वडाअध्यक्ष पदमा समेत तालमेलको सहमति भएको छ । जसअनुसार नगरका १० वडामध्ये ७ वडाको अध्यक्षमा एमालेले जसपालाई सघाउने छ भने बाँकी ३ वडाको अध्यक्षमा जसपाले एमालेलाई सघाउने छ ।
एमाले जिल्ला अध्यक्ष प्रेम गुरुङ र जसपाका अध्यक्ष यानप्रसाद भट्टले मंगलबार सहमतिपत्रमा हस्ताक्षर गरेका थिए ।
यसअघि पालुङटारमा सत्ता गठबन्धनका कांग्रेस र जसपाबीच तालमेल भएको थियो । तर, पालिकाको नेतृत्व र वडाको विषयमा सहमति नजुटेपछि तालमेलको सहमति भाँडिएको थियो ।
तालमेलको सहमति भाँडिएपछि जसपा नेता भट्टराई पालुङटारमा चुनावी अभियानमा डेरा नै जमाएर खटिएका थिए । भट्टराईले यसअघि नै गण्डकी प्रदेशका सबैजसो पालिकामा एमालेसँग तालमेलको प्रयास गरेका थिए । तर, जसपाभित्रको विवादको कारण एमालेसँग तालमेलको सहमति हुन सकेको थिए ।
सम्बन्धित समाचार
वि.सं.२०७९ वैशाख २७ मंगलवार १६:३६ मा प्रकाशित
