हामी सबैकाे संसारन्यूज

क्युवाको अचार बोकेर
मार्खेजको चिट्ठीसँगै
फिडेल क्यास्ट्रोको सम्झना बोकेर
झोलामा खादेर युद्ध रचना
चे ग्वेरा नेपाल आइपुगेका छन्

छोपिएको इतिहासको भित्रि बाटो भएर
क्रान्ति पुगेको छ राजसी दरबारतिर
प्रतिकुल मौसमको चेपमा झोँक्राएको छ, आशा
बारुदी सुरुङको छेउमा उम्रेको छ, भटमास
चेलाई हेर्नुछ, घर्तीगाउँ
सोध्नु छ, उनलाई कमरेड रूपचन्द्र बिष्टबारे
के गर्छन् ति आजकल ?
इतिहास चिहानबाट उठ्छ कि उठ्दैनन्
मानिसहरूको आक्रोश
विचारको मृत्यु हुँदा
योद्धाहरुको छाती दुख्छ कि दुख्दैन ?
गोर्खा पुग्नु छ, चेलाइ
फेरिएको लालध्वजको चेहरा
र गोर्खा दरबारलाई हेर्नुछ र बुझ्नुछ
खबर छ
पेरिसडाँडामा हवाई फायरिङ गरेर
बुद्धनगर पुगेको लडाकुले
बानेश्वरमा बिर्सेको छ झोला
झोलामा के–के होला ?
चेलाई पूर्ण बिरामसँग भेट्नु छ
र धीत् मरूनजेल सुन्नु छ
जनयुद्धकालीन पुराना कविता
किन बन्द छ जनादेश साप्ताहिक ?
किन भुलिरहेका छ्न माओवादी कमरेडहरुले ?
गण्डक अभियानका रक्तिम दिनहरु
उदास मौसममा
उम्लेका छन् प्रश्न
उल्टो बगेको बागमती पुलमा
लप्सीको अचार खाँदै हुनुहुन्छ पम्फा भुसाल
देव दाइ युटुबमा अन्तरवार्ता दिँदै हुनुहुन्छ
खारा हान्ने प्रभाकर
सिटि टिभीको दृश्यहरुमा हारेका छन्
रात्रीको सात बजेको छ
हर्न बजिरहेको छ निरन्तर
जाडो छ बागमती पुलनेर
चिसो हावा बोकेर खडा छ मौसम
क्युवाको भटमासलाई
रोल्पाको गुन्द्रुकमा हालेर छडकाइरहेका छन् लडाकुहरु
भाइले तिहुन पकाउन बिर्सनु भएको रहेनछ
मिठो छ
चेसँग उभिएर गोरे दाइले भने
बाग्मती किन यती फोहोर छ
किन पुर्व लाली उठिरहेको छ
चे कहिल्यै भुल्दैनन्
कहिल्यै भुल्दैन क्रान्तिको नवीन अभिलेखलाई ।।