हामी सबैकाे संसारन्यूज

दीपा राई पुन । विश्व भुटानी सहित्य संगठनले स्थापन गरेको छ लाख नेपाली रुपैया नगद राशीको ’स्वीकारोक्ती आजीवन सिद्धी’ पुरस्कार प्रथम पटक नेपाली भाषी साहित्यकार लीलबहादुर क्षेत्रीलाई प्रदान गरिएको छ ।

जुलाई २९ देखि ३१ सम्म अमेरिकाको ह्यारिसबर्ग, पेन्सलभेनियामा आयोजित वृहत् अन्तर्राष्ट्रिय सृजनात्मक अनुष्ठान–५ कार्यक्रम उक्त पुरस्कार प्रदान गरिएको हो ।

प्रमुख अतिथि सिक्किमको पूर्वमुख्यमन्त्री तथा कवि पवन चाम्लिङ विशेष अतिथि डा गोविन्दराज भट्टराईको हातबाट संस्थाको संस्थापक अध्यक्ष डेन्जोम साम्पाङ, वर्तमान अध्यक्ष कर्ण गुरूङ र महासचिव पातलो अन्तरेको उपस्थितिमा पुरस्कार वितरण गरिएको थियो ।

भारतको असम, गुवाहाटीमा नै रहेका क्षेत्रीको पुरस्कार कवियत्री दीपा राई पुनले ग्रहण गरेकी थिइन् ।

यो पुरस्कारको राशी हरेक अनुष्ठानमा बढाउदै लगिने जानकारी संस्थापक अध्यक्ष डेन्जोम साम्पाङले बताएका छन् । अर्को अनुष्ठान–६ बाट अन्य बिधामा पनि पुरस्कार राखिने कुरा विशेष महत्वको साथ बताए ।

विश्व भुटानी सहित्य सगठनमार्फत स्थापित स्वीकारोक्ति फाउन्डेशन जीवनका जस्तोसुकै आरोह अवरोहलाई स्वीकार गर्दै अघि बढ्ने जीवन दर्शनलाई आत्मसाथ गर्दै स्थापित उक्त पुरस्कार अहिलेसम्मको नेपाली राशीको सबैभन्दा ठुलो पुरस्कार हो !

बसाइँ,ब्रम्हपुत्रको छेउछाउ,अतृप्तजस्ता ओजनदार कृतिका कृतिकार क्षेत्री असममा बसेर आजीवन नेपाली साहित्यका क्षेत्रमा योगदान गर्ने साहित्यकार हुन् । यो पुरस्कार नेपाली साहित्य क्षेत्रमा अनवरत सेवा गर्ने ब्यक्तित्वलाई प्रदान गरिने फाउन्डेशनले बताएको छ ।