हामी सबैकाे संसारन्यूज

निम्ब तरु, अर्घाखाँची

एकछिन भलादमी पियक्कडको पछि लागें
अभद्र तर शाश्वत वकालत
अश्लिल तर सार्थक वक्तव्य
यो भन्दा पनि अझ धेरै सुन्न

जनावरहरमा सवार देवताहरुको
पौराणिक कथाहरु पुर्नव्याख्या सुन्न
मानिसहरुमा सवार मानिसहरुको
ऐतिहासिक कथाहरु सुन्न
म पियक्कडको पछि लागें

जीवनको चासोबाट पर भइरहेको
जीवनको चिन्ताबाट उम्केर उन्मुक्त भइरहेको
शालिन पियक्कडको प्रभावले
सर्वभोगी पनि जोगी बन्न बाध्य भए जस्तो
म बाध्य भएँ

सडक–गल्लीहरुमा मज्जाले
निर्धक्क फलाक्दै त हिड्न हुन्छ
ढुक्कसँग चित्त नबुझेको कुरामाथि
मनको भरमार असन्तुष्टिहरु
मज्जाले ढुक्क भन्दै हिड्न त हुन्छ

ओछ्यान समातेर रहनुभन्दा
चिहानको बाटो समातेर हिँड्नुभन्दा
यो उपाय बडो काइदा लाग्यो
तब म
कन्दनी कसेर शरणमा परें पियक्कडको

जब मानिस ईश्वर संगतमा पर्छ
जब प्रेतको नजिक हुन्छ
तब मानिसहरुलाई वास्ता गर्न छोड्छ

भलै नहोला÷नदेखिएला शिष्टता
नरहला सभ्यता
तर
म पियक्कडको पछाडि हिँडिरहेछु, एकछिन ।