हामी सबैकाे संसारन्यूज

कुशल राई, दार्जिलिङ्ग

ए पुरूष
एकदिन आउनु अनि काटेर लानु
मेरो गर्भाशय
अनि गरिदिनु पोष्टमार्टम
त्यसपछि छुट्याउनु
तिमी नौ महिना बसेको तिम्रो
आमाको गर्भाशय र,
मेरो गर्भाशय बिचको अन्तर ।

ए पुरूष
एकदिन आउनु र समाउनु
एक हातले मेरो अनि अर्काे हातले
तिम्रो आमाको स्तन
त्यसपछि छुट्याउनु
तिमिले संसार देख्न अनि बाँच्न
कलिलो ओठले चुसेको तिम्रो आमाको
स्तन र मेरो स्तन बिचको अन्तर ।

ए पुरूष
एकदिन आउनु
अनि हेर्नू
मेरो गुप्तांगबाट बगेको रातो रगत
अनि काट्नु आफ्नो हात
त्यसपछि छुट्याउनु
तिम्रो र मेरो रातो रगत बिचको अन्तर ।

ए आफैलाई शक्तिशाली ठान्ने पुरूष,
तिमी यति त गर्न सक्छौ नि ?
यदि सकेनौं भने
एकदिन म गरिदिनेछु
तिम्रो शुक्राणुको हत्या
अनि, जरैबाट उखेली दिनेछु
तिम्रो नरपिशाच अण्डकोश
अनि झुण्ड्याई दिनेछु कुनै ठुलो साईन बोर्डमा
र लेखी दिनेछु तिम्रै पापी रगतले
यहाँ
बलात्कारी पुरूषहरूको पोष्टमार्टम गरिन्छ ।