हामी सबैकाे संसारन्यूज

प्रजित कुँवर, वालिङ्ग, स्याङ्जा

१.
जन आवाज उठाएर जेलमा कोच्नुपर्छ
देशको धमिरा समाएर जेलमा कोच्नुपर्छ
करोडौँ कुम्ल्याएर भाग्ने भ्रष्टाचारीहरु
अब घोक्रेठ्याक लाएर जेलमा कोच्नुपर्छ ।

२.
पाएको छु माया भएभरको, कुनै कमी छैन
गाउँ मै छ सुविधा सहरको, कुनै कमी छैन
मेरो घरकै नजिक भट्टी पसल छ मायालुको
मलाई चुरोट रक्सी बियरको कुनै कमी छैन ।

३.
बाँच्नै भयो प्रिया कठिन, तिम्रो सम्झनामा
यो मन पागल बन्छ किन, तिम्रो सम्झनामा
सुकेर जिउ मुरली जस्तै भएको छ अचेल
आँखा नरोएको छैन दिन, तिम्रो सम्झनामा ।

४.
उनको दिलमा पिरतीको घर, बनाउन मन छ
छुवाछुतको धरालाई बन्जर, बनाउन मन छ
सिँगो राष्ट्र बाँधेर यो समानताको परिधीमा
जातीय खाडल पुरेर समथर बनाउन मन छ ।

५.
युवाले देशमै रोजगार पाउँछन्, प्रयोग गर्नसके
कत्ती बचाएर राख्नु भनेर धन, प्रयोग गर्नसके
आयस्रोतको मुहान बन्छ बद्लिन्छ देशकै मुहार
देशका खानीहरू गरेर उत्खनन्, प्रयोग गर्नसके ।