हामी सबैकाे संसारन्यूज

भैरव ढकाल, धरान –१३, सुनसरी

थाहा थिएन आस्था कसरी निर्माण गर्ने
तर जवानीका पलहरूमा
आस्थालाई मन भित्र जगेडा गर्थें ।

कहिले ठिकै गरेजस्तो लाग्छ
कहिले बेठीक गरेजस्तो लाग्छ
जे गरेको भए पनि
मन हल्का नै थियोे
लगातार मतदान गर्थेँ ।

कहिले मूर्दावाद गर्थें, कहिले जिन्दावाद गर्थें
कहिले भीडभाडमा लाइन लागेर मतदान गर्थें ।
कहिले आफैसँग खेलबाड गर्थें
कहिले राजनीतिसँग खेलबाड गर्थें ।

त्योबेला
पक्ष भएँ, विपक्ष भएँ
समर्थन गरेँ, विरोध गरेँ ।
कोहीसँग निराश बनिन
सबैसँग आसै गरेँ ।

तर
यो विगतको कुरा हो
अब त म थकित भैसकेको छु
मेरो विश्वास धरमराइसकेको छ ।

त्यसैले भन्दै छु
मेरो बिचारको सम्मान गरिने होभने
अब औंलामा मतदानको निसानी होइन
मेरो हातमा विजित उम्मेदवारको कान हुनुपर्छ ।