Sansar News
काठमाडौं । हाल बागमती प्रदेशको केही स्थानहरू र बाँकी प्रदेशको थोरै स्थानहरुमा मेघ–गर्जन÷चट्याङ्ग हल्का देखि मध्यम वर्षा भइरहेको छ ।
मौसम पूर्वानुमान महाशाखाका अनुसार आज दिउँसो कोशी र गण्डकी प्रदेशको एक–दुई स्थानमा मेघ–गर्जन\चट्याङ्ग सहित भारी वर्षाको समेत सम्भावना रहेको छ ।
त्यसैगरी राति पनि कोशी, मधेश, गण्डकी, लुम्बिनी र सुदूरपश्चिम प्रदेशको एक–दुई स्थानमा मेघ–गर्जन/चट्याङ्ग सहित भारी वर्षाको समेत सम्भावना रहेको छ। मधेश प्रदेश र लुम्बिनी प्रदेशको तराईका थोरै स्थानहरूमा हावा हुरीको समेत सम्भावना रहेको छ।
त्यस्तै आज तिनाउ नदीको जलसतह खतराको तह आसपास रहने तथा नवलपारसी (ब.सु.प), पाल्पा, रुपन्देहीका नदीहरुमा जलसतह खतराका तह आसपास रहने महाशाखाले जनाएको छ ।
त्यसैगरी इलाम, झापा, मोरङ, सिन्धुपाल्चोक, काठमाडौं, ललितपुर, भक्तपुर, मकवानपुर, चितवन, गोरखा, लमजुङ, स्याङजा, गुल्मी, अर्घाखाँची, कपिलवस्तु र दाङ आसपास भइ बहने नदीहरुको वहाव उल्लेख्य बढ्ने हुनाले सतर्कता अपनाउन अनुरोध गरिएको छ ।
वि.सं.२०८० असार १९ मंगलवार ०८:५४ मा प्रकाशित
