हामी सबैकाे संसारन्यूज

मचिन्द्र खत्री, धरान, सुनसरी

नगर भयो कुरा, दिन गयो नफर्किएला
दिल,दिल हो सखे ! सहज यो नचर्किएला
वतन रुँदा तिमी मगन छौ खुसी मनाऊ
जनजनमा भने, भनभनी यसै गनाऊ ।।१

दिनदिन क्रान्तिका गफ भए सुनेँ रमाएँ
पथ पथ पाउ यी निडर भै यतै जमाएँ ।
सहज हुने सबै गरिबका कठोर पीडा
करुण कुरा सुनेँ तर अझै उही छ पीडा ।।

धनपति देखियौ जब मिल्यो भँडार सारा
र नव कुवेर झैँ सुखद मोजको छ पारा ।
अब पनि क्रान्तिका गफ गरे कसै नमानूँ
असल हुँडारका गण भनी यता म जानूँ ।।

गणगणका भयौ अब त रूप देखियो यो
धन पथमा गयौ तब त वाक्य लेखियो यो ।
सबदिन झूटको महलमात्र देखिदामा
किन कसरी सधैँ किरण लुक्छ छेकिदामा ।।

कुटिल छ यो कला अझ बुझौँ म जालझेल
सरसर यो चढूँ झब कता म वायु रेल ?
वतन गयो चिनेँ अलि अबेर भूल मेरो
पलपल देख्छु यो चटकमात्र आज तेरो ।।

छन्द : वाणिनी
गण : न ज भ ज र गु
सङ्केत : lll  lSl  Sll  lSl  SlS  S