हामी सबैकाे संसारन्यूज

कल्पना भट्टराई,टोखा, काठमाडौं

हिलोमा डुबेको छ चुर्लुम्म देश,
भयो पाइला चाल्नु पर्ने विशेष ।
गरे के नहोला र चौतर्फ सोचौँ,
समस्या समाधानको मार्ग खोजौँ ।१।

समस्यै समस्या छ भन्छन् कसैले,
गरौँ थालनी आजबाटै सबैले ।
भलो होस् सबैको, त्यतातर्फ सोचौँ,
समस्या समाधानको मार्ग खोजौँ ।२।

सधैँ शक्तिले मात्र चल्दैन देश,
छली युक्तिले मात्र चल्दैन देश ।
सदाचार सत्कर्म, कर्तव्य रोजौँ,
समस्या समाधानको मार्ग खोजौँ ।३।

चलाओैँ दुवै हात खुट्टा दिमाग,
नलागोस् कुनै काममा खोट,दाग ।
चिनौँ भ्रष्ट को को लगी जेल कोचौँ,
समस्या समाधानको मार्ग खोजौँ ।४।

थिए शक्तिशाली हिजो बाबु बाजे,
यही राष्ट्रलाई बचाए र बाँचे ।
गरौँ एकता काँधमा काँध जोडौँ,
समस्या समाधानको मार्ग खोजौँ ।५।

बलात्कारका छन् यहाँ नित्य केस,
सयौं बालिका बेचिएका विदेश ।
युवा शक्ति पर्देशिए जान रोकौँ,
समस्या समाधानको मार्ग खोजौँ ।६।

छ पाखो पखेरो रुँदै आज हेर,
युवा शक्ति मुग्लान ताकी पसेर ।
यता वृद्ध बेहाल छन् आँसु रोकौं,
समस्या समाधानको मार्ग खोजौँ ।७।

अहंकारले स्वार्थले, लोभले झन्,
बढेको छ आफन्तमै द्वेष झन् झन् ।
स्व–अस्तित्व हुर्काउने कर्म रोजौं,
समस्या समाधानको मार्ग खोजौँ ।८।

लथालिङ्ग छन् काम सर्वत्र हेर,
गरे पार लाग्ला अवश्यै मिलेर ।
नयाँ सिर्जना,भावना साथ जोडौँ,
समस्या समाधानको मार्ग खोजौँ ।९।

छन्द : भुजङ्गप्रयात
गण : य य य य
सङ्केत :lSS lSS lSS lSS