हामी सबैकाे संसारन्यूज

यम रेग्मी, दाङ

गर्ल्याम्म ठूला सतिसाल ढल्छन्
चुर्लुम्म अग्ला हिलशैल डुब्छन्
समुन्द्र सुक्दै मरुभूमि बन्छ
उठेर मुर्दा दिउँसो दगुर्छ ।१।

बौलाइ हावा बनिदिन्छ आँधी
लुकेर सुर्जे दिन बन्छ राति
आगो र पानी प्रिय मित्र बन्छन्
मुसा बिराला बिच प्रेम चल्छन् ।२।

भाले निशामै खुब थाल्छ बास्न
नदी उकालोतिर लाग्छ बग्न
बन्छन् कुकर्मी जग पुज्य देव
कात्रो रिसाई बुन भन्छ जेब ।३।

आफैँ रचेको घर फोड्छ मान्छे
आफैँ हिँडेको पथ टोड्छ मान्छे
देख्दैछ सेतो तर भन्छ कालो
भनेर पानी खुन खान्छ आलो ।४।

मान्छे मरेका सपना बटुल्छ
निर्लज्ज बन्दै भिडमा दर्गुछ
र वंशभित्रै रसरङ्ग चल्छ
यो सभ्यताको बिच प्रश्न उठ्छ ।५।

छन्दः उपजाति (इन्द्रवज्रा+उपेन्द्रवज्रा)
गण : त त ज गु गु ज त ज गु गु
सङ्केत : SSl SSl lSl S S SSl lSl S S
विश्रामः पाँच अक्षरमा