Sansar News
कुशल नाथ योगी, कालिकोट
हुन्न ढल फोहोर कम तिम्रो सहरको
भन्छ मै सुन्दर अहम् तिम्रो सहरको
स्वच्छ हावापानीले गरिदिन्छ स्वागत
गाउँमा पर्दा कदम तिम्रो सहरको
छट्पटाएको सडकमा हेरी बस्छन्
रैझछ मानवता खतम तिम्रो सहरको
आपसी चल्दैन पैँचो गाउँमा झैँ
मन छ नाङ्गो खै सरम तिम्रो सहरको
प्यार गर्छे गाउँकी भागी सहरकी
गाउँको मल्हम जखम तिम्रो सहरको
रूप होस् अनुपम छुँदैमा दाग लाग्ने
गाउँझैँ अर्को जनम तिम्रो सहरको
जल दूषित खाना विषादीयुक्त खान्छन्
हुन्छ खै कसरी हजम तिम्रो सहरको
बहरः रमल मुसद्दस सालिम
अर्कान : फाइलातुन फाइलातुन फाइलातुन
वजन : २१२२ २१२२ २१२२
वि.सं.२०८० चैत २४ शनिवार ०७:४८ मा प्रकाशित
