हामी सबैकाे संसारन्यूज

उदय अतीत (स्याङ्जा)

सिंहासन छैन, तर आत्मा विशाल छ,
मुकुट छैन, तर शिर उच्च छ,
दरबार छैन, तर हृदयमा राज्य छ।

मेरा लुगा साधारण छन्,
तर मन चोखो छ,
मेरा पाइला धुलोमा छन्,
तर हिम्मत अटल छ।

दरबारका भित्ता,
मेरा होइनन्,
तर मेरो संसार,
अनन्त छ,
मेरा सपना,
सिङ्गो ब्रह्माण्ड समाउँछन्।

मेरा सिपाही छैनन्,
तर साहस मेरो हतियार हो,
मेरा मन्त्री छैनन्,
तर विवेक मेरो सल्लाहकार हो।

म हरेक बिहान,
आफ्नो युद्धको मैदानमा,
उत्साहका साथ उत्रन्छु,
जीवनका सङ्घर्षमा,
सधैँ अगाडि बढ्छु।
म दरबार बाहिरको राजा हुँ,

मेरो राज्य मेरो मन हो,
मेरो ऐश्वर्य मेरो आत्मविश्वास हो,
मेरो सम्पत्ति मेरो सत्कर्म हो।

मेरा आँसुहरू,
मेरो शक्ति हुन्,
मेरा पीडाहरू,
मेरो प्रेरणा हुन्,
मेरा सङ्घर्षहरू,
मेरो विजय हुन्।
त्यसैले त..
म दरबार बाहिरको राजा हुँ,

संसारले नचिन्ने,
तर स्वयंलाई जान्ने,
सच्चा राजत्वको अर्थ बुझ्ने,
म दरबार बाहिरको राजा हुँ।
हो म संयम आफैँमा राजा हुँ।