Sansar News
स्याङ्जा । स्याङ्जामा खोलाले बगाउँदा एक जनाको मृत्यु भएको छ । शुक्रबार बिहान अरगौदी खोला तर्ने क्रममा खोलाले बगाउँदा एक जनाको मृत्यु भएको हो ।
मृत्यु हुनेमा पुतलीबजार नगरपालिका १ वीरेन्द्रनगर बस्ने ७४ वर्षीय तिल बहादुर भुजेल रहेको जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक ईन्द्र बहादुर रानाले जानकारी दिए ।
शुक्रबार बिहान अरगौदी खोला तर्ने क्रममा खोलाले बगाउँदा भुजेल घाइते भएका थिए । उनलाई आफ्नै छोरा होम बहादुर भुजेलले उद्दार गरी जिल्ला अस्पताल स्याङ्जामा लगिएको प्रहरीको भनाई छ ।
भुजेलको उपचारको क्रममा अस्पतालमा मृत्यु भएको जिल्ला प्रहरी कार्यालय स्याङ्जा बताएको छ । प्रहरीले घटनाको सम्बन्धमा आवश्यक अनुसन्धान गरिरहेको जनाएको छ ।
वि.सं.२०८१ असार २१ शुक्रवार १२:१६ मा प्रकाशित
