हामी सबैकाे संसारन्यूज

राजन सिलवाल,खोपासी, काभ्रे

१.
आँखा चिम्लिनेहरू ! गगनमा घाम त हुन्छ नै
हाम्रो जीवन नै रामायण हो, राम त हुन्छ नै
प्रज्ञा ! शब्द साधनाको जुन मूलबाटोमा छु म
जसले लेखोस् इतिहास, मेरो नाम त हुन्छ नै ।

२.
त्याग केही छँदै छैन तिम्रो, देशसँग माग मात्रै छ
भोगसँग कुनै वैराग छैन, अनवरत राग मात्रै छ
कोही कालो ढुंगामा ईश्वर देख्छन्, पुज्छन्, तिमीले
त्यो उज्यालो देखेनौ जूनमा, भन्छौ दाग मात्रै छ ।

३.
म गाउँ हुँ रहने छु, तिमी नगर भएर हेर
सहन्छु म धरती हुँ, तिमी सगर भएर हेर
प्रज्ञा ! तिम्रो सौन्दर्य पनि एउटा बाढी हो
जब थामिन्छ, जीवनलाई बगर भएर हेर ।

४.
म छु अहिले न काँडा न फूल भएर
थिएँ म, दुई किनार जोड्ने पुल भएर
सिउँदोको सिन्दुर थियो त्यो कुनै दिन
जुन खसेको छ धरतीमा धुल भएर ।

५.
न न्याय न निसाफ दाम लागेपछि
मर्नैपर्छ रावणहरू राम लागेपछि
पर्ख, ए मेरा सुकुमार सपनाहरू !
थामिन्छ बाढी पनि घाम लागेपछि ।