हामी सबैकाे संसारन्यूज

मनीषकुमार शर्मा ‘समित’
मध्यपुर ठिमी, भक्तपुर

मन्दिरको छेउ भिख मागेर जीवन गुजार्ने बुढी आमासँग सधैँ देखादेख हुन्थ्यो उसको । केही दिन्छ कि भन्ने आशामा टुलुटुलु हेर्थिन् तर छाक टार्न पनि धौ धौ हुने अवस्थामा रहेको उसले के नै दिन सक्थ्यो र ?

आज अचानक दुवै आमनेसामने भए । उसले उनलाई गहिरो सहानुभूतिको साथ हेर्यो र भन्यो, ‘खल्ती रित्तो छ आमा, तपाईँलाई केही दिन सक्दिन ।’

यो सुनेर बुढी आमाको अनुहारमा अनौठो चमक आयो । उनले मुस्कुराउँदै भनिन्, ‘तिमीले मलाई सोचे भन्दा धेरै दियौ बाबु ।’

केही नदिँदा पनि चाहिने भन्दा बढी दिएको कुराले ऊ सोचमग्न अवस्थामा पुग्यो । असामञ्जस्यलाई चिर्दै बुढी आमाले भनिन् , ‘बाबु सधैँ यस्तै मिठोसँग ‘आमा’ भनेर बोलाऊ है।’