हामी सबैकाे संसारन्यूज

कविराज घिमिरे, चाँगुनारायण, भक्तपुर

नारी धर्ती गगन पनि हुन् विश्व ब्रह्माण्ड हाँक्ने
साह्रोगाह्रो जति हुन पुगोस् काँधमा काँध थाप्ने
यी हुन् गङ्गा मयल सबका नष्ट पार्छिन् धुएर
नारीबाटै सबल पथको हुन्छ निर्माण धेर ।।१

नारी बन्छिन् अथक सबला सिर्जनाकी मुहान
नारीलाई पलपल सधैँ डाक्छ हाँस्तै बिहान
नारी तोड्छिन् छलकपटका फाँट आफैँ खटेर
नारीबाटै सबलपथको हुन्छ निर्माण धेर ।।२

सम्झे मात्रै भुवनभरको कर्मको द्वार खुल्छ
कालोमैलो परपर हुँदै स्वच्छता बढ्न थाल्छ
नारी गर्छिन् सुखदपनका खेतमा बारबेर
नारीबाटै सबलपथको हुन्छ निर्माण धेर ।।३

टिक्ने छैनन् असुरजनले दृष्टि बाङ्गो बनाए
नाङ्गिन्छन् ती युगयुग सधैँ मानमा आँच लाए
नारी चोखो हृदय बटुली चढ्दछिन् शैल हेर
नारीबाटै सबलपथको हुन्छ निर्माण धेर ।।४

चुल्हो चौको वरिपरि रही हाँक्तछिन् राज्य नारी
लेख्छिन् पढ्छिन् सुयश कविता काव्य हुन् उच्च नारी
फालीदिन्छिन् कपट जहिल्यै हर्षलाई उनेर
नारीबाटै सबलपथको हुन्छ निर्माण धेर ।।५

छन्द : मन्दाक्रान्ता
गण : म भ न त त गु गु
सङ्केत : SSS – Sll – lll – SSl – SSl – S –S