हामी सबैकाे संसारन्यूज

के.पी.पौडेल जस्ताघरे
विदुर न.पा.–४, बट्टार,नुवाकोट
हाल बालाजु काठमाडौं

नौलो क्रान्ति भनेर मानिसहरू, भेला गरायौ किन ?।
उम्दा शक्ति भला युवा र युवती, होम्यौ तिमीले किन ?।।
त्यो आन्दोलनमा लिएर जनता, गर्थ्यौ खुबै गर्जन ।
निर्धा मानिस जीर्णका गरिबका, को सुन्छ खै क्रन्दन ?।।–१

हाँक्यौ युद्ध हिजो विना नियमको, मान्छे बिलाए कति ।
विद्रोही जन राज्य शक्ति सबले, मुर्दा बनाए कति ।।
छन् धेरै थलमा अपाङ्ग निमुखा, छन् युद्धका कारण ।
गर्थ्यौ तारिफ वीरका रगतको, दिन्थ्यौ कडा भाषण ।।–२

लड्थ्यौ युद्ध विधानको विधि विना, मास्यौ हजारौँ जन ।
हालै शासक धूर्त जोकर हुँदा, खोक्रो भयो जीवन ।।
आगोतुल्य करालका भय बन्यो, सर्वत्र पीडा छ यो ।
हाम्रा सन्ततिका विशाल सपना, हावा हुरीझैँ भयो ।।–३

धर्ती मातृ समान हुन् यदि भने, लात्ती उठायौ किन ?।
मान्छे देव समान हुन् यदि भने,बन्छौ खराबी किन ?।।
मार्यौ काल बनेर मानिसहरू, नाच्छौ धरामा खुबै ।
उम्दा कानुन न्यायको नियमको, घाँटी निमोठ्छौ अझै ।।–४

मान्छेका अपराधका कदमले, पीडा बढ्यो देशमा ।
धम्की धाक दिँदै उदण्ड मतिका, छन् कंसका भेषमा ।।
उम्दा कानुन संविधान विधिको, छौ माथि आफू सधैँ ।
भन्छौ दण्ड मिलोस् यहाँ गरिबका, आवास भत्कोस् सबै ।।–५

सत्ता शासन शक्ति मान पदको, त्यो भागबन्डा गरी ।
सक्नेले बहुतै लुटे लुटिलिए, देऊ निया हे हरि ।।
मान्छेका मनतन्त्रको नियतको, कस्तो छ खै बन्धन ।
के नाप्यो गणतन्त्रले मुलुकमा, छायो निराशापन।।–६

छन्द : शार्दूलविक्रीडित
गण : म स ज स त त गु
गण सङ्केत :SSS – llS – lSl – llS – SSl – SSl – S