हामी सबैकाे संसारन्यूज

शशीश्री आचार्य
बौद्ध कुमारीगाल, काठमाडौँ

१.
जसको चरित्र खोटो
उसकै हुन्छ आयु
अत्यधिक लामो मोटो ।

२.
कता जाँदैछ समाज ?
धरातल बिर्से आफ्नो
छैन यिनलाई लाज ।

३.
लाजले भुतुक्कै भएँ
आफ्नो मायालाई देखेर
खुसीले मात्तिँदै गएँ ।

४.
जिन्दगी कस्तो कस्तो
धनीको महङ्गो साह्रै
गरिबको चाहिँ सस्तो ।

५.
तिमीले मलाई चाहेनौ
मैले चाहेको तिमी
भावना बुझेर आएनौ ।

६.
नारी पुरुष बराबर
नहोस् सिमित नारामा
व्यवहारमै लागु गर ।

७.
सारा बन्धन तोडेर
आउने छु तिमीसँगै
आफन्त सबै छोडेर ।

८.
कवितामा भावना पोखौँ
सुन्दर अक्षर जोडेर
अञ्जुलीमा शब्द जोखौँ ।

९.
मन शान्त रहोस्
दूर रहुन् चिन्ता
जोस जाँगर बढोस् ।

१०.
नारीले मान्दिनन् हार
कठिन कार्य पनि
सजिलै लाउँछिन् पार ।