हामी सबैकाे संसारन्यूज

कल्पना अधिकारी, टोखा, काठमाडौं

मुना कोपिलामा रमायो वसन्त ।
सुखैश्वर्य छाओस् धरामा अनन्त।
तिमी सुस्त सुस्तै चलाएर पाउ।
लिई सोच नौलो नयाँ वर्ष आऊ।१।

सबै आङले घामको ताप पाऊन्
बिहानै उठी कोइली गीत गाऊन्
बसी ओठमा मन्द मुस्कान छाऊ
नयाँ योजनामा नयाँ वर्ष आऊ।२।

परेवा मलेवा रमून् प्रीत गाँसी।
हटाऊन् पुराना र दुर्भाव बासी।
वितृष्णा, निराशा, भगाएर हाउ ।
रमी सिर्जनामा नयाँ वर्ष आऊ।३।

गरून् बात मौरी मिठा पुष्प साथ।
सदा जिन्दगीमा उदाऊन् प्रभात।
नपाऊन् कुनै दुष्टले हेर्न दाउ ।
सुसंस्कार बोकी नयाँ वर्ष आऊ।४।

भरोसा र आशा तिमी मात्र एक
बनून् काम बाँकी रहेका हरेक।
विरामी छु सञ्जीवनी साथ आऊ।
पसी काव्यमा कल्पनाको हँसाऊ।५।

छन्द – भुजङ्गप्रयात
गण – य य य य
सङ्केत – lSS – lSS – lSS – lSS