हामी सबैकाे संसारन्यूज

डा. ठाकुर मोहन श्रेष्ठ, काठमाडौँ

छ बढ्दै युध्दको खतरा उता खलबल भएको छ
लिँदै छन् ज्यान बाढीले यता जलथल भएको छ

सजाएको छु तनमनमा कुँदेका शब्द मालाले
कहाँ पाइन्छ देखेको हृदय अलमल भएको छ

पुगेको छैन सपनाको दुरावस्था छ विपनामा
मियो छानौँ सबलअब्बल भनी छलफल भएको छ

समालेको छु भारी मन कहरको सामना गर्दै
पुगून् तिम्रा कुरा मनका कतै मलजल भएको छ

सबै पाइन्छ किस्तामा चिताएका कुराकानी
कतै भुल्यौ तिमीमा नै यो दिल ढलपल भएको छ

बहर – हजज मुसम्मन सालिम
अर्कान – मुफाईलुन् , मुफाईलुन् , मुफाईलुन् , मुफाईलुन्
वजन – १२२२ – १२२२ – १२२२ – १२२२
काफिया – अल
रदिफ। – भएको छ
अभ्यास – उज्यालो पाठशाला