Sansar News
बाबुराम न्यौपाने “उत्स“, दमक, झापा
पुनर्जन्मको गोल चक्कर
मेरो अस्तित्वको
अमूर्त उत्खननमा
सृष्टिको पहिलो र अन्तिम
मान्छेसँग
हातेमालो गर्न लालायित छ।
मुक्तिका व्यग्र चित्कारहरु
जन्म र मृत्युको
साँघुरो मितेरी साँघुमा
भ्रमित ज्ञानको कुहीरो भित्र
टुक्राटुक्रा भएर
सर्लक्क विसर्जन हुन्छन्
तर
जीवनको खुश्बु
चिहानको माटोमा पनि मगमगाउछ।
जीवन रहस्यको
अन्तिम परिभाषा टटोल्न
चिताबाट उठेको धुवाँ
र
चिताका खरानीका कणहरु
उल्टै मेरो चेतनासँग
व्यङ्ग्यात्मक प्रश्न गर्छन्।
वि.सं.२०८२ साउन १० शनिवार ०८:२२ मा प्रकाशित
