हामी सबैकाे संसारन्यूज

हरिभक्त सिग्देल ‘महेश’, काठमाडौँ

१.
म निदाएछु तिम्रो काखमा सानु राम सम्झिएर
सुखद् थियो त्यो क्षण लेख्छु म नाम सम्झिएर ।
माया प्रेमको दुनियाँमा एकै छिन्को उपस्थिति
मलाई लाग्छ प्रिये हिँड्नै पर्छ काम सम्झिएर ।।

२.
इच्छाहरूको डुङ्गा चढी मित्र हो सागर तर्न सकिँदैन
विषयको ज्ञान र आँट नभई कुनै काम गर्न सकिँदैन ।
अध्ययन र तपस्याले मात्र मान्छेहरू ठुला बन्दछन्
नातावाद कृपावादमा केही भएन भनी मर्न सकिँदैन ।।

३.
घर जलाई आगो ताप्ने ज्ञानीहरूको लाममा हामी
कर्तव्यच्युत अधिकारीहरूको ठुलै धाममा हामी ।
लाज पचेका नेता राष्ट्रद्रोही ठहरिएपछि के गर्ने?
काम कर्तव्य योग्यता होइन पैसाको खाममा हामी ।।

४.
मिठो लाग्छ आमाको दुध त्यही पिएर हुर्कियौँ
सकेपछि सानुतिनो सहयोग नि दिएर हुर्कियौँ ।
अब गत्यावरोध न नेतृत्व ठिक न समाज ठिक
हुनेले धेरै नहुनेले चोरेरै पनि थोरै दिएर हुर्कियौ ।।