हामी सबैकाे संसारन्यूज

२८ जेठ, दमौली । दुर्घटना कम गराउन तनहुँ जिल्लामा ४३ वटा कन्भेक्स मिरर जडान गरिएको छ । जिल्ला प्रहरी कार्यालय, ट्राफिक प्रहरी कार्यालय र सडक डिभिजन कार्यालयले ती कन्भेक्स मिरर जडान गरेका हुन् ।

पृथ्वी राजमार्गको मुग्लिन कोत्रे सडकखण्डमा २८ वटा, डुम्रे बेँसीसहर सडकखण्डमा नैवटा, भोर्लेटार जाने सडकमा दुईवटा, भिमाद जाने सडकमा एउटा र बन्दीपुर जाने सडकमा तीनवटा कन्भेक्स मिरर राखिएको जिल्ला ट्राफिक प्रहरी कार्यालय, तनहुँका इन्चार्ज प्रहरी नायब निरीक्षक कृष्णबहादुर क्षेत्रीले बताउनुभयो ।

नेपाल प्रहरी र ट्राफिक प्रहरीको सक्रियतामा सङ्घसंस्थाको सहयोगमा १८ वटा र २५ थान कन्भेक्स मिरर सडक डिभिजन कार्यालयको लगानीमा राखिएको क्षेत्रीले जानकारी दिनुभयो । यसका लागि रु सात लाख ७४ हजार खर्च भएको थियो ।