Sansar News
प्रमोद नेपाल, वीरगञ्ज, हाल- काठमाडौँ
१)
गरौँ श्रीकृष्णको जय
पालनहार पुनः जन्मी
दुष्टताको गरुन् क्षय ।
२)
अधोगति विकासको यात्रा
केहीलाई छ सत्रैसत्र
देशमा चारैतिर गाईजात्रा ।
३)
असह्य अभावको मार
विदेशको कठीन यात्रा
जीवनको हुँदैछ हार ।
४)
नारी बस्छन् निराहार
व्रत जीवनार्थ पतिको
तीजमा नमानी भार ।
५)
विकास असारे कच्चा
बजेट सक्याउने मेलो
कहिले बन्लान् सच्चा ?
६)
जनताको पैसामा आहाल
नानीदेखि लागेको बानी
बन्ने आफूमात्र मालामाल ।
७)
सनातनीको लागि चन्दन
नास्तिकलाई ज्ञान कहाँ
रक्षासूत्र हो रक्षाबन्धन ।
८)
आस्थामा खेलवाड गरे
हटाए संविधानको व्यवस्था
आफ्नै आँखाबाट झरे ।
९)
नागहरू छन् बसेका
ढुकुटीमा फण उठाएर
जनताको नजरबाट खसेका ।
१०)
पाउनु सच्चा मित्रता
चन्द्रमामा पुग्नु जत्तिकै
चाहिन्छ मनको पवित्रता ।
वि.सं.२०८२ कात्तिक १ शनिवार ११:२० मा प्रकाशित
