हामी सबैकाे संसारन्यूज

इन्दिरा प्रयास, काठमाडौँ

हुन् सृष्टि कर्ता जननी वसुन्धरा
चम्पा चमेलीसरि छिन् हराभरा
दुख्छिन् कुनामा अवला निरन्तर
नारीविनाकाे घर हुन्न सुन्दर ।।

आकाश जस्तै सुकिलाे सुभावना
गर्छिन् सबैमा मनले उपासना
सासू बुहारी ममता रहुन् घर
नारीविनाकाे घर हुन्न सुन्दर ।।

भान्सा उज्यालो रहने सबैतिर
मिष्ठान्न पाक्छन् रसिला चुलानिर
देवी यिनै हुन् किन खाेज्नु मन्दिर
नारीविनाकाे घर हुन्न सुन्दर ।।

सन्तान भन्दै सहने यहाँ मुमा
लुट्छन् लुटेरा कलिला टुनामुना
जन्मिन्छ छाेराे जन ठान्छ उर्वर
नारीविनाकाे घर हुन्न सुन्दर ।।

नारा लगाए अधिकार खातिर
फेरिन्छ सत्ता घरबार आखिर
हुन् शक्ति नारी मनले पुजा गर
नारीविनाकाे घर हुन्न सुन्दर ।।

छन्द : इन्दवंशा
५ अक्षर पछि विश्राम
गण : त – त – ज – र
सङ्केत : SSI – SSI – ISI – SIS
उज्यालो छन्दशालामा रहेको पुरानो सृजना ।