हामी सबैकाे संसारन्यूज

हिरा भट्ट “बदमास नम्बर दुई”
पञ्चेश्वर-६,बिजुल,बैतडी

म छेउको पहाडमा विशाल जो गुफा थियो
बिडाल बस्छ सोच्दथेँ हुँडार रूप देखियो
म सिंह मस्त नीदको नियाल्छु धारिला छुरा
नझस्क है नझस्क है नझस्क लिम्पियाधुरा
।१।

म शान्तिको तलाउमा डुबेछु बुद्ध नादले
हुँडारले तलाउको बिथोल्छ शान्ति मादले
बुनेछ जाल पातमा जरा भुलेछ माकुरा
नझस्क है नझस्क है नझस्क लिम्पियाधुरा
।२।

हिरण्यगर्भ बाँड्दथेँ म शैलको जरामुनि
अरण्य दाह रोज्छ ऊ विषाद पिञ्जरा बुनी
सिकार ऊ म सिंहको नतर्स शैल टाकुरा
नझस्क है नझस्क है नझस्क लिम्पियाधुरा
।३।

हुँडारको चियो गरी बनाउनू नयाँ गढी
डडेल्धुरा बझाङ दार्चुला अछाम बैतडी
म आउँला हुँडारको चिथोर्न लुछ्न पाखुरा
नझस्क है नझस्क है नझस्क लिम्पियाधुरा
।४।

म सार्वभौम शक्तिको सुरम्य गीत गाउँला
म आउँला म आउँला अवश्यमेव आउँला
सजाय भोग्न हस्तिनी भुलिन् निषादका कुरा
नझस्क है नझस्क है नझस्क लिम्पियाधुरा
।५।

छन्द : पञ्चचामर
गण : ज – र – ज – र – ज – गु
सङ्केत : ISI – SIS – ISI – SIS – ISI – S