Sansar News
काठमाडौं । ४८औँ पुष्पलाल स्मृति दिवसका अवसरमा पुष्पलाल मित्रता केन्द्र (पीएफसी) ले ‘वर्तमान राजनीतिक परिस्थितिमा वामपन्थी दलहरूको भूमिका’ विषयक विचार गोष्ठी आयोजना गर्ने भएको छ।
नेपालमा वामपन्थी आन्दोलन विभाजन, वैचारिक अन्यौलता र बदलिँदो राजनीतिक समीकरणका कारण चुनौतीपूर्ण मोडमा पुगेका बेला ४८ औँ पुष्पलाल स्मृति दिवसको अवसर पारेर विचार गोष्ठी आयोजना हुन लागेको हो।
शुक्रबार, साउन ८ गते बिहान ११:३० बजे नयाँ बानेश्वरस्थित अर्पण ब्याङ्क्वेटमा हुने कार्यक्रममा नेपालका प्रमुख वामपन्थी नेताहरूको सहभागिता रहने आयोजकले जनाएको छ।
कार्यक्रमका प्रमुख अतिथि नेपाली कम्युनिष्ट पार्टी (नेकपा)का संयोजक पुष्पकमल दाहाल ‘प्रचण्ड’ रहनेछन्। त्यस्तै विशिष्ट अतिथिका रूपमा नेकपाका सहसंयोजक माधवकुमार नेपाल, नेपाल कम्युनिष्ट पार्टी (मसाल)का महामन्त्री मोहनविक्रम सिंह, नेकपा (एमाले) का उपमहासचिव प्रदीप ज्ञवाली,क्रान्तिकारी कम्युनिस्ट पार्टीका हरिभक्त कँडेल तथा विश्वभक्त दुलाल ‘आहुति’ वक्ता रहने हुने कार्यक्रम छ।
आयोजकका अनुसार वर्तमान राजनीतिक अवस्था, वामपन्थी आन्दोलनका चुनौती, दलहरूबीचको सहकार्य तथा आगामी राजनीतिक दिशाबारे विचार–विमर्श गर्ने उद्देश्यले गोष्ठी आयोजना गरिएको हो।
पुष्पलाल मित्रता केन्द्रले राजनीतिक दलका नेता, बुद्धिजीवी, अनुसन्धानकर्ता तथा सरोकारवालाहरूलाई कार्यक्रममा सहभागी हुन आग्रह गरेको छ।
वि.सं.२०८३ साउन ७ बिहीवार १२:२२ मा प्रकाशित
