हामी सबैकाे संसारन्यूज

मलाई भारतको मेट्रो चढ्ने रहर होइन
नत चाइनाको विकास हेर्ने रहर नै छ
मलाई त केवल मेरो देश
समृद्ध भएको हेर्ने रहर छ

मलाइ, विदेशका नेताको सिको गर्ने रहर छैन
नत उनीहरुको विचार नै
हुवहु लागु गर्ने रहर नै छ
मलाई त केवल यहि माटोले जन्माएको
यहि माटोले बनाएको जनप्रिय
नेताको विचार नक्कल गर्ने रहर छ

मलाई, युरोप जस्तै मेरो देश,
बनोस् भन्ने रहर छैन
नत अमेरिकाको जस्तो
सुख सयलको नै आस रहेको छ
मलाई त केवल
यहि माटोलाई नै रंग्याउने रहर छ
नेपाली माटोको सुवास
संसारभर चलोस् भन्ने रहर छ

मलाई विदेशबाट आयातितमा रमाउने रहर छैन
नत ती, आयातितहरुमा गर्व गर्ने नै रहर छ
मलाई त केवल यहि माटोमा उव्जिएको खाएर
यहि माटोमा उत्पादन भएको लगाएर
विश्वसामु छाति फुलाएर हिड्ने रहर छ

मलाई नेपाली पसिना र रगत निर्यात गर्ने रहर होइन्
रगत र पसिना यहि माटोमा सिँच्ने रहर छ
मलाई रेमिट्यान्समा रमाउने रहर होइन्
देशमै आर्थिक समृद्धिको लहर ल्याएर
विदेशबाट आउने रेमिट्यान्स बन्द गर्ने रहर छ

मलाई नेपाली सपना विदेशमा
हराएको देख्न र सुन्न पटक्कै मन छैन
मलाई त जीवनको अन्तिम क्षणमा
जन्मभूमिको काखमा टाउको राखेर मर्ने रहर छ
मलाई मेरो देश समृद्ध भएको हेरेर मर्ने रहर छ ।।।