काठमाडौँ । प्रगतिवादी साहित्यकार लोकबहादुर थापा मगर ‘झुस्या’का दुई उपन्यास ‘सम्झनाका घाउ’ र ‘विश्वास’ बुधबार लोकार्पण भएका छन् ।
बुधबार आयोजित कार्यक्रममा नेकपा (माओवादी केन्द्र)का वरिष्ठ नेता रामबहादुर थापा, नेपाल प्रज्ञा–प्रतिष्ठान मातृभाषा विभाग प्रमुख श्रवण मुकारुङ, प्रलेस नेपालका अध्यक्ष मातृका पोखरेल लगायतले लोकार्पण गर्नुभयो ।
यी दुवै उपन्यास ‘झुस्या’ले यसअघि नै प्रकाशनमा ल्याएका मगर भाषाका दुई उपन्यासको नेपाली संस्करण हुन् । मगर साहित्यमा विशेष दख्खल राख्ने उहाँले ‘आखिरीआङ भगुमान मालेलेसा’ (आखिरीमा भगवान् रहेनछ) र ‘आर्मिट्च मामरी’ (सम्झनाका घाउ) प्रकाशन गरिसक्नुभएको छ । ती दुवैलाई ‘झुस्या’ आफैँले नेपालीमा अनुवाद गर्नुभएको हो । यो क्रममा ‘आखिरीमा भगवान् रहेनछ’लाई शीर्षक परिवर्तन गरेर ‘विश्वास’ राखिएको हो ।
उपन्यास ‘सम्झनाका घाउ’ दशवर्षीय माओवादी जनयुद्धको कथामा आधारित छ भने समाजमा रहेको कुसंस्कृति र अन्धविश्वासविरुद्धको आवाज ‘विश्वास’मा समेटिएको छ । प्रलेसको आयोजनामा भएको कार्यक्रममा नेता थापाले ‘झुस्या’का उपन्यासले ‘सत्यम्, शिवम् र सुन्दरम्’ तीनै कुरा स्थापित गरेको बताउनुभयो ।
कार्यक्रममा आहुति, जगत् उपाध्याय, रमेश भट्टराई लगायतले समीक्षा गर्दै कृति उपन्यासभन्दा बढी संस्मरणात्मक भएको बताउनुभयो । विसं २००९ मा स्याङ्जामा जन्मिनुभएका ‘झुस्या’का करिब २१ कृति प्रकाशन भइसकेका छन् ।
वि.सं.२०७३ असोज १४ शुक्रवार ०२:२५ मा प्रकाशित
