हामी सबैकाे संसारन्यूज

उनीहरुलाई दुख्दैन
या म बुझ्दिन
आमाहरु रुदा पनि
हासेरै रुन्छन

आमाहरुलाई जुन टिप्नु छैन
समयलाइ छोप्नु पनि छैन
न छ कुनै युद्ध जित्नु नै
सपनाहरुको भाग्नाबशेसबाट
केहि रहरहरु उमारेर फुलाउनु छ
र देख्नु छ त्यो फुल भित्र
तारा जस्ता उज्याला सन्तानहरुको मुहार

दिन जानेका छन्
आमाहरुको शब्दकोषमा
लिनुको परिभाषा हुदैन
कुरुप होलान बरु
यो र त्यो रुपमा
लुटाई रहन्छन आफुलाई जिन्दगि भर
तोक्दैनन दुधको मूल्य
खादा खादैको गास
फेर्दा फेर्दैको सास
पाइताला मुनि राखेर
बाच्छन अरुहरुका लागी
सुदामा हुन् आमाहरु

मैले सुनेको हु
आमाहरुको मन र फुल
उस्तै कोमल हुन्छ
त्यसैले आमाहरु हासिरहन्छ्न फुल जस्तै
आमाहरु शान्त हुन्छन
आँखा भरी बुद्ध पालेर
एउटा खोजमा हिड्छन
अमर प्रेमको तलासमा
त्यसैले
सन्तानहरुलाई सिकाउन
आमाहरु प्रेम र स्नेहका कथाहरु मात्र पढाउछन्

ब्रम्हाण्ड जस्तो आमाहरुको जिन्दगी
म चाहेर पनी
बुझ्न सक्तिन
हुन सक्छ मसंग
ठुलो मुटु छैन
हो
उनीहरुलाई दुख्दैन
या म बुझ्दिन
आमाहरु रुदा पनि
हासेरै रुन्छन